Nga vajzat e rekrutuara te rrethi i Putinit, dalin detajet tronditëse për rrjetin e Epstein në Rusi

Nga rekrutimi i vajzave të reja përmes agjencive të modelimit deri te përpjekja për të fituar akses në rrethin e ngushtë të Vladimir Putinit, Jeffrey Epstein kishte zhvilluar një rrjet të gjerë kontaktesh në Rusi për dekada të tëra, të cilin e përdori si për aktivitetet e tij personale ashtu edhe për t’u rikthyer në rrethet e elitës ndërkombëtare, pas dënimit të tij të parë për vepra penale seksuale.
Një hetim i gjerë nga Reuters zbulon se si financieri amerikan, i cili vdiq në burg në vitin 2019, u përpoq të ndërtonte marrëdhënie me oligarkët rusë, zyrtarët qeveritarë dhe njerëzit me akses në Kremlin, madje duke kërkuar një takim personal me presidentin rus.
Agjencia ndërkombëtare, pasi intervistoi më shumë se 24 persona dhe shqyrtoi qindra faqe dokumentesh gjyqësore, email-e dhe të dhëna fluturimi, identifikoi të paktën 17 gra nga ish-vendet sovjetike që iu bashkuan rrjetit të shfrytëzimit seksual të Epstein.
Megjithatë, pavarësisht spekulimeve që janë bërë herë pas here, Reuters thekson se nuk kishte prova që financuesi pedofil të punonte për inteligjencën ruse, të vepronte në emër të Moskës ose të arrinte të takohej me Putinin.
Marrëdhënia e tij me Rusinë filloi shumë kohë përpara se të bëhej politike. Në fillim të viteve 1990, pas rënies së Bashkimit Sovjetik, agjencitë e modelimit kërkonin vajza të reja në Evropën Lindore, duke u premtuar atyre karriera ndërkombëtare.
Një figurë qendrore në këtë aktivitet ishte agjenti francez i modelimit, Jean-Luc Brunel, një bashkëpunëtor i ngushtë i Epstein, i cili rekrutonte gra të reja nga Rusia dhe ish-republikat e tjera sovjetike.
Karakteristikë është dëshmia e një ish-modeleje, e cila i përshkroi Reuters një festë në Paris në vitin 1991, ku pa një vajzë ruse, e cila dukej se ishte në fillimet e adoleshencës, të ulur për orë të tëra në prehrin e Epstein. Gruaja e re kishte shpjeguar se Brunel kishte paguar për udhëtimin e saj në Francë, duke i premtuar se do ta bënte një modele të famshme.
Në vitin 2003, Brunel themeloi një agjenci modelimi në Miami, e cila më vonë u riemërua MC2 Models Management. Sipas hetimit, kompania rekrutonte gra nga Rusia, duke lehtësuar lëvizjen e tyre në Shtetet e Bashkuara, ndërsa Epstein u siguronte apartamente që të qëndronin.
Njëra prej tyre ishte Svetlana Pozidaeva, e cila u takua me ndërmjetësin amerikan të bursës në Paris në vitin 2008, kur ajo ishte rreth 23 vjeç. Ai i premtoi asaj se do ta ndihmonte të siguronte një kontratë me Victoria’s Secret.
Në vend të karrierës që ëndërronte, e reja e gjeti veten, sipas asaj që u ankua, të bllokuar në një marrëdhënie varësie të plotë financiare. Viza e saj ishte e lidhur me agjencinë, apartamenti i saj i përkiste Epstein dhe shpenzimet e saj personale u regjistruan si borxhe ndaj tij.
Ajo pretendoi se ai e abuzonte sistematikisht seksualisht, ndërsa kishte frikë se lidhjet e tij politike, madje edhe në Rusi, mund të përdoreshin kundër familjes së saj nëse ajo do të përpiqej të largohej.
Pas dënimit të tij në vitin 2008 dhe vuajtjes së një dënimi prej 13 muajsh, Epstein filloi t’i shihte lidhjet e tij në Rusi si një mjet të mundshëm për të rivendosur ndikimin e tij shoqëror dhe të biznesit. Sipas dokumenteve të shqyrtuara nga Reuters, ai kërkoi kontakte me biznesmenë të fuqishëm, përfshirë manjatin e pasurive të paluajtshme Vladislav Doronin dhe miliarderin Oleg Deripaska.
Në vitin 2010, ai e priti Doronin për darkë në New York dhe shkëmbeu mendime me të rreth një projekti të madh investimi në Moskë. Në të njëjtën kohë, ai u përpoq të siguronte një takim me Deripaskën përmes një të njohuri që ia prezantoi politikani britanik Peter Mandelson. Nuk dihet nëse takimi u zhvillua.
Megjithatë, objektivi i tij më i madh ishte vetë Vladimir Putin. Në vitin 2011, një bashkëpunëtor i Epstein tha në një e-mail të brendshëm se ai kishte planifikuar të takohej me presidentin rus si pjesë e një udhëtimi në Rusi. Udhëtimi përfundimisht u anulua dhe tre persona që e njihnin i thanë Reuters se nuk besonin se një takim i tillë ishte rregulluar në të vërtetë.
Në vitin 2014, ai u takua në Paris me Sergei Belyakov, atëherë zëvendësministër i ekonomisë së Rusisë dhe organizator i Forumit Ekonomik Ndërkombëtar të Shën Petersburgut. Një vit më vonë, në prill 2015, ai organizoi një darkë në Nju Jork ku Belyakov u prezantua me ish-kryeministrin izraelit Ehud Barak.
Menjëherë pas kësaj, ai i kërkoi Barakut, me anë të një e-mail, t’i sugjeronte zyrtarit rus që Epstein të takohej me Putinin dhe këshilltarët e tij, duke argumentuar se ata mund të përfitonin nga njohuritë e tij për tregjet, monedhat dhe sistemin financiar ndërkombëtar.
Sipas një personi të njohur me çështjen, Barack nuk e përcolli mesazhin specifik.
Një aspekt tjetër interesant i hetimit ka të bëjë me udhëtimin e parë të njohur të Epstein në Rusi, në prill të vitit 1998. Ai vizitoi Sarovin, një qytet që kishte qenë jashtë hartës publike për dekada për shkak të lidhjes së tij me programin e armëve bërthamore sovjetike.
Atje, ai iu bashkua një misioni të udhëhequr nga ekzekutivi i atëhershëm i lartë i Microsoft, Nathan Myhrvold, i cili po eksploronte mundësitë e zhvillimit të softuerëve në Rusi.
Një nga pjesëmarrësit kujtoi se Epstein vizitoi shtëpinë e vjetër të fizikanit sovjetik Andrei Sakharov dhe e pyeti një shkencëtare ruse se kur ishte paguar për herë të fundit. Ajo tha se nuk e dinte arsyen e vërtetë për pjesëmarrjen e tij në udhëtim.
Katër vjet më vonë, në nëntor të vitit 2002, Epstein udhëtoi përsëri në Rusi, këtë herë me Ghislaine Maxwell dhe Brunel. Në Moskë, ata u takuan me biznesmenin e pasur ruso-çeçen Umar Dzhabrailov, dhe më pas vizituan Shën Petersburgun, ku financuesi ishte i interesuar në arkitekturën dhe dekorimin e pallateve perandorake.
Këto janë vetëm dy udhëtimet e tij të njohura në Rusi, megjithëse, sipas dokumenteve të Departamentit të Drejtësisë të SHBA-së, ai mbajti viza ruse për pjesën më të madhe të periudhës nga viti 2002 deri në vitin 2019. Rindërtimi i marrëdhënieve të tij me Rusinë është i ndërlikuar nga fakti se disa njerëz që mund të hidhnin dritë mbi rastin kanë vdekur.
Epstein u gjet i vdekur në një burg të Nju Jorkut në vitin 2019 dhe Brunel në një burg francez në vitin 2022. Të dyja vdekjet u cilësuan zyrtarisht si vetëvrasje.
Në mars të vitit 2026, Dzhabrailov u gjet gjithashtu i vdekur, me një plagë me armë zjarri në kokë, në apartamentin e tij luksoz në Moskë. Autoritetet ruse e kanë shqyrtuar rastin si një vetëvrasje të mundshme, pa u bërë publike prova përfundimtare të aktivitetit kriminal.


