Tërmet i fuqishëm/ Probleme me energjinë dhe qarkullimin rrugor, ka të plagosur

Bota

Tërmet i fuqishëm/ Probleme me energjinë dhe qarkullimin rrugor,

Një tërmet me magnitudë 6.7 ka goditur pjesën qendrore të Perusë, duke shkaktuar dëme  në banesa, ndërprerje të energjisë elektrike dhe probleme në qarkullimin rrugor.

Sipas Institutit Gjeofizik të Perusë (IGP), lëkundjet sizmike u regjistruan në orën 19:09 sipas kohës lokale, me epiqendër rreth 30 kilometra në veriperëndim të qytetit Junin dhe në një thellësi prej 129 kilometrash.

Tërmeti u ndje në disa rajone të vendit, përfshirë Ancash, Ica, Ucayali, Cerro de Pasco, Huanuco dhe Callao, si dhe në kryeqytetin Lima. Lëkundjet u raportuan edhe në disa zona të Kuitos, kryeqytetit të Ekuadorit.

Sipas gazetës peruane “El Comercio”, tërmeti u përjetua nga banorët me intensitet nga mesatar në të fortë. Në Lima, rreth 150 kilometra në vijë ajrore nga Junin, shumë familje dolën nga banesat e tyre pas lëkundjeve. Gazetarët e agjencisë AFP raportuan se qindra persona evakuuan ndërtesat në lagjen Miraflores.

Drejtori i Institutit Gjeofizik të Perusë, Hernando Tavera, deklaroi për televizionin Latina Noticias se thellësia e tërmetit ndikoi në intensitetin e lëkundjeve në sipërfaqe.

“Pavarësisht magnitudës dhe thellësisë së tij, ai nuk ishte aq intensiv sa do të kishte qenë nëse do të ndodhej në një thellësi më të vogël”, u shpreh Tavera.

Tërmet i fuqishëm/ Probleme me energjinë dhe qarkullimin rrugor,

Ai shtoi se lëkundjet prekën një pjesë të gjerë të Perusë qendrore, nga rajoni Ancash deri në Ica dhe zonën e Junin, duke arritur deri në kufijtë e zonës së xhunglës.

Ministri i Mbrojtjes i Perusë, Rafael Belaunde, bëri të ditur se në disa zona të rajonit Junin janë raportuar dëme të lehta në banesa, ndërprerje të furnizimit me energji elektrike dhe kufizime në qarkullimin rrugor. Sipas tij, fillimisht nuk ishin raportuar dëme në njerëz apo pasoja për shëndetin dhe integritetin fizik të banorëve.

Megjithatë, gazeta “El Comercio” raportoi për një 17-vjeçar të plagosur në lagjen Barrios Altos, pasi një copë betoni nga një galeri i ra në kokë. I riu u transportua në spitalin 2 de Mayo, ku po merr trajtim mjekësor.

Ndërkohë, rrëshqitjet e dherave kanë shkaktuar probleme në disa akse rrugore, duke vështirësuar qarkullimin.

Peruja ndodhet në të ashtuquajturën “Unaza e Zjarrit e Paqësorit”, një brez me aktivitet të lartë sizmik dhe vullkanik që shtrihet nga Japonia, përmes Azisë Juglindore, deri në gjithë pellgun e Oqeanit Paqësor. Pozicioni gjeografik e bën vendin veçanërisht të ekspozuar ndaj tërmeteve të fuqishme.

ME TE LEXUARAT

NA SHKRUAJ

Portali Lajmifundit sjell Lajme nga Shqipëria, rajoni dhe bota në kohë rekord. Ju lutemi na kontaktoni nëse doni të kontribuoni me informacione të vlefshme për publikim në portalin tonë.

Kliko për më shumë informacion