“Lënë” gurët, protestuesit hedhin molotovë drejt policisë dhe mediave

Protesta te Rruga e Durrësit ka marrë një kthesë të dhunshme pasditen e sotme, duke u përshkallëzuar në një përplasje të ashpër me Forcat e Policisë së Shtetit. Pas grumbullimit fillestar para Kryeministrisë, turmat u zhvendosën drejt Ministrisë së Arsimit, ku situata doli plotësisht jashtë kontrollit pak pas orës 14:00.

Pamjet dhe raportimet nga terreni dëshmojnë një skenar të rëndë. Raportohet se protestuesit kanë nisur të shkulin pllakat e rrugës dhe t'i përdorin ato, bashkë me gurë dhe sende të tjera të forta, si mjete sulmi ndaj kordonit policor. 

Pavarësisht thirrjeve të përsëritura me altoparlant nga mjetet ujëhedhëse të policisë për të ruajtur qetësinë dhe për të shmangur aktet e dhunshme, turmat kanë refuzuar të binden.

Pika kulminante e tensionit u shënua kur drejt uniformave blu filluan të vërshojnë shishet me molotov. Breshëria e lëndëve shpërthyese nuk ka kursyer as përfaqësuesit e medias që po raportonin në vijën e parë; një operator televiziv rrezikoi seriozisht jetën pasi mori flakë në këmbë nga një prej bombave molotov të hedhura nga protestuesit.

Në përgjigje të agresionit, forcat e rendit kanë ndërhyrë duke përdorur granata zhurmuese, gaz lotsjellës dhe ujë me presion për të shpërndarë turmat.

Megjithatë, sasia e madhe e lëndëve djegëse që po përdoret nga protestuesit ka detyruar një pjesë të efektivëve të policisë të zbrapsen fizikisht dhe të kërkojnë mbrojtje pas automjeteve të tyre të blinduara.

Autoritetet kanë paralajmëruar se të gjithë individët e përfshirë në këto akte po identifikohen dhe do të përballen me pasojat ligjore.