Berisha kundër projektbuxhetit 2027: Është përgatitur në fshehtësi, ndëshkon qytetarët dhe bizneset e ndershme

Politikë

Berisha kundër projektbuxhetit 2027: Është përgatitur

Kryetari i Partisë Demokratike, Sali Berisha, ka kundërshtuar ashpër projektbuxhetin e vitit 2027, duke e cilësuar atë si të paligjshëm dhe antikushtetues. Sipas tij, qeveria e ka hartuar dokumentin në fshehtësi të plotë, pa marrë në konsideratë interesat e qytetarëve dhe të sipërmarrjes.

Deklaratat Berisha i bëri gjatë një mbledhjeje me Grupin Parlamentar të PD-së në selinë blu, ku akuzoi qeverinë se përmes këtij projektbuxheti favorizon një grup të kufizuar njerëzish, ndërsa rëndon financiarisht shumicën e shqiptarëve dhe bizneseve.

“Ky buxhet paraqitet në Kuvend në mënyrën më tipike si buxhet i një narkoshteti. Është përgatitur në fshehtësinë më të madhe, sikur të ishte dokumenti më sekret i shtetit, jo dokumenti me implikacione direkte në xhepat e të gjithë qytetarëve shqiptarë. Injorim total i qytetarëve dhe i biznesmenëve”, deklaroi Berisha.

Kreu i demokratëve përgëzoi deputetët e opozitës për kundërshtimin e projektbuxhetit dhe paketës fiskale, duke theksuar se qëndrimi i Partisë Demokratike ndaj tyre do të jetë kategorikisht kundër.

Berisha u ndal veçanërisht te trajtimi fiskal i bizneseve, duke akuzuar qeverinë se po favorizon subjektet që kanë fshehur aktivitetin e tyre ndër vite, ndërsa po rëndon sipërmarrjet që, sipas tij, kanë ushtruar aktivitetin në mënyrë të rregullt.

“Në një anë shpall paqen fiskale me ata të cilët kanë fshehur vite e stërvite veprimtarinë e tyre, kurse bizneseve të ndershme u bie me satër. Kjo paketë ndëshkon biznesin e ndershëm”, u shpreh ai.

Një tjetër shqetësim i ngritur nga Berisha ishte informaliteti në sektorin e turizmit. Ai pretendoi se shkalla e informalitetit në strukturat akomoduese arrin në 78%, duke krahasuar performancën e Shqipërisë me atë të Malit të Zi sa i përket numrit të netëve të qëndrimit të turistëve.

Sipas tij, në vend që qeveria të përqendrohet te formalizimi i ekonomisë dhe lufta ndaj informalitetit, po godet bizneset që operojnë rregullisht.

Në përfundim, kreu i PD-së ritheksoi kundërshtimin e forcës politike që drejton ndaj projektbuxhetit të vitit 2027 dhe paketës fiskale, duke i cilësuar ato si masa që rëndojnë qytetarët dhe sipërmarrjen shqiptare.

ME TE LEXUARAT

NA SHKRUAJ

Portali Lajmifundit sjell Lajme nga Shqipëria, rajoni dhe bota në kohë rekord. Ju lutemi na kontaktoni nëse doni të kontribuoni me informacione të vlefshme për publikim në portalin tonë.

Kliko për më shumë informacion