Drejtoresha e “Raiffeisen Bank” zhduket me milionat e klientëve, pse nuk ka hetim?

Raiffeisen Bank Albania u denoncua nga mediat në ditët e fundit të dhjetorit 2023 për një skemë mashtrimi të vjedhjes së klientëve nga drejtoresha e një dege e identifikuar si Esela Metaj, e cila, sipas raportimeve në bashkëpunim me disa arkëtare ka vepruar në dëm të klientëve të bankës.

Raportimet sugjerojnë se vjedhja e llogarive bankare është qindra mijëra euro në degën e Bankës në zonën e Kombinatit. Mediat kanë shkruar se “ka pasur ndërhyrje për të izoluar hetimet që të mos shkojnë deri tek roli i kupolës drejtuese (të Raiffeisen Bank) si drejtori i Përgjithshëm Christian Canacaris apo anëtarja e bordit drejtues për Retail, Vilma Baçe”. 

Protagonistja e dyshuar e skandalit, Esela Metaj, sipas raportimeve të medias “është zhdukur” prej 24 nëntorit 2023 e madje thuhet se ka marrë me vete milionat e klientëve të Raiffeisen Bank në degën ku punonte në Tiranë.

Arkëtarja e përfshirë në skemën e zhvatjes- sipas mediave- ka zbuluar se pre e vjedhjes së parave nga llogaritë kanë qenë klientë shqiptarë dhe të huaj. Por ndërkohë që paratë e qytetarëve janë prekur, zyra e shtypit e bankës, në një përgjigjje për median nuk e mohoi vjedhjen.

“Në artikujt e publikuar nga disa portale, një pjesë e konsiderueshme janë ekzagjerime dhe nxjerrje nga konteksti” – ishte përgjigja e bankës për median Zoom. Përgjegjës për fshehjen e rastit në sytë e publikut, sipas raportimeve mediatike janë Drejtori i Përgjithshëm i Raiffeisen Bankës Christian Canacaris dhe anëtarja e bordit drejtues për Biznesin Retail, Vilma Baçe. 

I habitshëm është edhe qëndrimi i institucioneve kontrolluese e rregullatore si Banka e Shqipërisë apo zyra mëmë e bankës në Austri. Në këtë rast, habi përbën edhe qëndrimi i institucioneve të hetimit, pasi nëse ka vjedhje duhet të ketë hetim penal qoftë edhe pa denoncim, me procedura të nisura kryesisht pas daljes së rastit në media.

Rrënjët e rastit duken të thella, pasi një publikim i 24 shtatorit të vitit 2007 ka përshkrua se Z.Bledar I, drejtor Rajonal ne rrugen Bardhyl, ka punesuar dhe ka promovuar mbesen e gruas se tij Esela Metaj (protagoniste e skandalit të fundit), e pakulifikuar ne cdo aspekt profesional, duhet te sqaroj ketu se ky drejtor prej pak kohesh eshte shkarkuar nga detyra me motivacionin e nenkuptuar dhe te paraqitur perpara bordit nga eprori i tij z. Alban C.

Çfarë ndodhi në një rast të ngjashëm në Bosnje?!

Vjedhja e klientëve nga drejtuesit e Raiffeisen Bank në Bosnje Hercegovinë u pasua me denoncimin nga vetë drejtuesit e bankës në Sarajevë ndaj punonjësve që kishin ngritur skemën e mashtrimit. Ata pushuan nga puna punonjësit e përfshirë dhe sqaruan klientët për çfarë kishte ndodhur.

Ngjarja u shoqërua me hetime të policisë dhe prokurorisë së Sarajevës që arrestuan punonjësit e përfshirë. Denoncimi i vjedhjes nga organet eprore të bankës, i distancoi ata nga krimi duke rritur besimin tek klientët se ngjarje të tilla nuk do të ndodhin në të ardhmen dhe nuk tolerohen.