"Diktator", studentët ironizojnë thirrjen e Ramës për dialog, vendosin te Politekniku fotot e sjelljes policore

Studentët protestues kanë ironizuar sërish thirrjet e përsëritura të kryeministrit Edi Rama për dialog, duke e bërë të qartë se e vetmja kërkesë e tyre mbetet dorëheqja e kreut të qeverisë.

Në mjediset e jashtme të Universitetit Politeknik, të rinjtë kanë ndërmarrë një aksion simbolik: mbi disa karrige të zbrazëta ata kanë vendosur fotografi që dokumentojnë dhunën policore të ushtruar ndaj protestuesve gjatë ditëve të fundit.

Krahas fotove, studentët kanë ngjitur edhe fletë me mbishkrimin e prerë: ”Diktator”.

Edhe pse kryeministri bëri sot një tjetër thirrje publike për ulje në tryezë bisedimesh, të rinjtë u shprehën të prerë se nuk do të ketë asnjë kompromis apo dialog. Sipas tyre, kërkesa për dorëheqjen e tij është e panegociueshme dhe protesta do të vijojë.