"Kujdes! Mos e konsumoni", AKU ngre alarmin: Rreth 3 ton puding proteinik “Arla” me copëza xhami në treg

Një produkt ushqimor që përdoret gjerësisht nga personat që ndjekin një regjim të pasur me proteina është përfshirë në një alarm europian për sigurinë ushqimore. Bëhet fjalë për pudingun proteinik të markës “Arla”, me origjinë nga Danimarka, ku janë konstatuar prani të copëzave të xhamit.

Pas këtij sinjalizimi, Autoriteti Kombëtar i Ushqimit ka njoftuar marrjen e masave dhe u ka kërkuar konsumatorëve shqiptarë të tregojnë kujdes të veçantë. Shqetësimi është edhe më i madh për faktin se në tregun vendas kanë hyrë rreth 3 ton nga produkti i dyshuar.

Rasti u evidentua fillimisht në Danimarkë, ku disa konsumatorë raportuan probleme gjatë përdorimit të pudingut. Ankesat çuan në aktivizimin e sistemit europian RASFF, përmes të cilit autoritetet njoftohen për rreziqet që lidhen me produktet ushqimore.

Paralajmërimi nuk përfshin të gjitha produktet e markës Arla, por vetëm tre lote të veçanta. Për këtë arsye, qytetarët që e kanë blerë këtë puding duhet të kontrollojnë informacionin e shënuar në paketim.

Lote të prekura janë:

Arla Protein Pudding me çokollatë – Batch ES26244001, me afat skadence 07.04.2027.

Arla Protein Pudding me karamel – Batch ES26272001, me afat skadence 26.04.2027.

Arla Protein Pudding me karamel – Batch ES26287001, me afat skadence 08.05.2027.

Një tjetër seri e produktit është përfshirë në kontrolle, por nga verifikimet paraprake rezulton se nuk ka mbërritur në Shqipëri.

Çfarë duhet të bëjnë konsumatorët?

Prania e xhamit në një produkt që konsumohet si ushqim mund të shkaktojë dëmtime serioze në organizëm. Copëzat mund të shkaktojnë plagosje në gojë dhe në aparatin tretës, si dhe dëmtime të brendshme në rast se gëlltiten.

Qytetarët që kanë blerë pudingun me një nga tre numrat e serisë së identifikuar duhet të ndërpresin menjëherë konsumimin e tij, edhe nëse produkti nuk është hapur apo nuk ka kaluar afati i skadencës. Ai duhet të kthehet në dyqanin ku është blerë.

Nga ana tjetër, subjektet tregtare janë të detyruara të largojnë produktet e prekura nga shitja. Autoritetet po ndjekin situatën për të garantuar që lotet e dyshuara të mos vijojnë të jenë të disponueshme për konsumatorët.