Revolta e të rinjve në Gjermani kundër qeverisë Merz, mijëra protestues në rrugët e qyteteve: “Koha për rezistencë”

Mijëra të rinj kanë dalë në protesta në disa qytete të Gjermanisë, duke kundërshtuar politikat e qeverisë së kancelarit Friedrich Merz. Demonstratat u organizuan nga lëvizja “GenZ regelt!” në Berlin, Frankfurt, Këln, Mynih dhe dhjetëra qytete të tjera.

Protestuesit shprehën pakënaqësinë për rritjen e kostos së jetesës, gjendjen e shkollave, shkurtimet e shpenzimeve publike dhe vendimet politike që, sipas tyre, nuk marrin në konsideratë interesat e brezit të ri.

Me pankarta në duar, të rinjtë përcollën mesazhe kundër qeverisë dhe kancelarit Merz, ku ndër të tjera shkruhej: “Koha për rezistencë” dhe “Merz duhet të ikë”.

Një tjetër çështje që nxiti reagimin e tyre ishte rritja e shpenzimeve ushtarake dhe modeli i ri i shërbimit vullnetar, përmes të cilit synohet shtimi i trupave në ushtrinë gjermane. Protestuesit shprehen të shqetësuar se kjo nismë mund të hapë rrugën për rikthimin e shërbimit të detyrueshëm ushtarak.

Për mbarëvajtjen e demonstratave, autoritetet angazhuan mijëra efektivë policie. Gjatë tubimeve pati raportime për hedhje fishekzjarrësh dhe disa arrestime, megjithëse pjesa më e madhe e protestave u zhvillua në mënyrë paqësore.

Sipas të dhënave të policisë, në Berlin morën pjesë rreth 2,700 persona, në Mynih 1,800 dhe në Frankfurt rreth 1,000. Në Këln, pjesëmarrja rezultoi dukshëm më e ulët se pritshmëritë e organizatorëve, të cilët kishin regjistruar paraprakisht 15 mijë persona.

“Po dalim në rrugë për një jetë që të gjithë mund ta përballojnë”, deklaroi Veronika Dinter, zëdhënëse e lëvizjes “GenZ regelt!”, duke theksuar shqetësimin e të rinjve për perspektivën e tyre në të ardhmen.