Hodhi benzinë mbi një mjet dhe plagosi dy policë, arrestohet 47-vjeçari gjerman në Shkodër (EMRI)

Policia e Shkodrës ka vënë mbrëmjen e sotme në pranga një shtetas gjerman, i cili ka refuzuar kontrollin dhe ka sulmuar me thikë dy efektivë policie, duke i plagosur.

Bëhet me dije se efektivët e Policisë kanë ndaluar shtetasin gjerman Jan-Friedrich Krebs 47 vjeç, pas marrjes së një telefonate se ky i fundit kishte hedhur benzinë mbi mjetin e një 27-vjeçari shqiptar, në aksin Hani i Hotit–Shkodër.

Por, në momentin që Policia ka tentuar të ndalojë 47-vjeçarin gjerman, ky i fundit ka sulmuar me thikë punonjësit e patrullës, duke i lënduar. Efektivët janë transportuar me urgjencë drejt spitalit, ku po marrin ndihmë mjekësore.

Malësi e Madhe / Informacion paraprak

Rreth orës 17:30, në sallën operative të DVP Shkodër ka njoftuar shtetasi A. Q., 27 vjeç, se gjatë udhëtimit me automjetin e tij, nga Hani i Hotit në drejtim të Shkodrës, drejtuesi i një automjeti tjetër dyshohet se i kishte hedhur benzinë mbi automjet, në afërsi të një pike karburanti, pranë pikës së kalimit kufitar.

Pas marrjes së njoftimit, shërbimet e Policisë kanë ndërhyrë menjëherë dhe kanë ndaluar automjetin e dyshuar në fshatin Pjetroshan.

Drejtuesi i këtij automjeti, shtetasi gjerman J. K., 47 vjeç, ka refuzuar të identifikohet dhe, gjatë ndërhyrjes për neutralizimin e tij, ka goditur me mjet prerës (thikë) dy punonjës të Patrullës së Përgjithshme, inspektorët S. B. dhe I. S., të cilët janë transportuar në spital për ndihmë mjekësore.

Shërbimet e Policisë kanë neutralizuar dhe kanë shoqëruar 47-vjeçarin në ambientet e Komisariatit të Policisë Malësi e Madhe, për kryerjen e veprimeve të mëtejshme procedurale.

Grupi hetimor vijon punën për sqarimin dhe dokumentimin e plotë të rrethanave të ngjarjes.