Trump paralajmëron: SHBA do të rinisë sulmet më 4 nëntor ndaj Iranit

Tensionet mes Shteteve të Bashkuara dhe Iranit rrezikojnë të përshkallëzohen sërish, ndërsa administrata e presidentit Donald Trump po shqyrton mundësinë e ndërmarrjes së operacioneve të reja ushtarake kundër Teheranit.

Sipas raportimeve të mediave amerikane, sulmet mund të rifillojnë që më 4 nëntor, menjëherë pas zgjedhjeve të mesmandatit në SHBA, të planifikuara për një ditë më parë.

Portali amerikan MS NOW, duke iu referuar tre zyrtarëve të lartë arabë që kanë folur në kushte anonimiteti, raporton se Uashingtoni ka njoftuar aleatët e tij në rajonin e Gjirit Persik për mundësinë e një vale të re goditjesh ushtarake ndaj Iranit.

Sipas këtyre burimeve, bëhet fjalë për operacione të shkurtra, por intensive, të cilat mund të shënojnë një fazë të re të përballjes mes dy vendeve.

Megjithatë, deri tani nuk ka asnjë konfirmim zyrtar se presidenti amerikan ka miratuar një plan konkret për rifillimin e sulmeve.

I pyetur lidhur me këto informacione, një përfaqësues i Shtëpisë së Bardhë shmangu komentet mbi planet e mundshme ushtarake, duke theksuar se administrata amerikane nuk diskuton publikisht operacionet që mund të ndërmarrë.

Zyrtari nënvizoi gjithashtu se presidenti Trump vijon t’i mbajë të hapura të gjitha alternativat, me synimin për të penguar Iranin që të zhvillojë armë bërthamore.

Një tjetër element që mund të ndikojë në vendimmarrjen e Uashingtonit është situata politike brenda Partisë Republikane. Sipas raportimeve, mbështetësit e Trump nuk kanë një qëndrim të përbashkët për përfshirjen e mëtejshme amerikane në konfliktin me Iranin.

Ndërsa një pjesë mbështet një politikë më të ashpër ndaj Teheranit, të tjerë kundërshtojnë angazhimin e SHBA-së në operacione të reja ushtarake jashtë vendit.

Për momentin, përballja ushtarake mes Uashingtonit dhe Teheranit mbetet në një fazë pezullimi. Sipas raportimit, forcat amerikane nuk kanë ndërmarrë sulme ndaj objektivave iraniane që prej 1 shtatorit.

Vetë Trump kishte deklaruar më herët se nuk synonte të autorizonte operacione të reja ushtarake gjatë periudhës zgjedhore.

Në këto kushte, ditët pas zgjedhjeve të 3 nëntorit mund të jenë vendimtare për të përcaktuar nëse tensionet mes dy vendeve do të vijojnë të mbahen nën kontroll apo do të shndërrohen në një përballje të re ushtarake.