Transporti urban në kaos, kërkon lehtësira nga qeveria, publikohen kërkesat e tyre

Shoqata Kombëtare e Transportit Qytetas i kërkon qeverisë përjashtimin e autobusëve të transportit publik, nga taksa e re e qarkullimit, heqjen e akcizës së karburantit dhe aplikimin e një norme të reduktuar të TVSH-së prej 6%.

Propozimet synojnë të kufizojnë rritjen e kostove të operatorëve dhe të garantojnë vijimësinë e shërbimit publik.

Shoqata Kombëtare e Transportit Qytetas i ka paraqitur qeverisë një paketë propozimesh për lehtësimin e barrës fiskale të sektorit, në kuadër të diskutimeve për Paketën Fiskale 2027. Kërkesat lidhen me taksën e re të qarkullimit, akcizën e karburantit dhe trajtimin e TVSH-së për shërbimin e transportit publik qytetas.

Në lidhje me propozimin për heqjen e taksës së qarkullimit nga çmimi i karburantit dhe transferimin e saj në një mekanizëm të ri taksimi të automjeteve, shoqata kërkon që autobusët e regjistruar dhe të licencuar për transport publik qytetas të përjashtohen shprehimisht nga detyrimi i ri, nëse ai do të aplikohet si taksë vjetore mbi automjetet.

Sipas shoqatës, taksa aktuale e qarkullimit mbi gazoilin është 32 lekë për litër, pa përfshirë efektin e TVSH-së, duke përbërë një zë të drejtpërdrejtë të kostove të operatorëve. Për këtë arsye, kërkohet që ndryshimi i mekanizmit të mbledhjes së taksës të mos sjellë një barrë të re fiskale për transportin publik.

Propozimi parashikon gjithashtu një dispozitë të posaçme ligjore për përjashtimin e autobusëve, si dhe procedura të thjeshtuara verifikimi përmes licencave, dokumentacionit të mjeteve dhe regjistrave të autoriteteve kompetente.

Kërkohet heqja ose rimbursimi i akcizës

Një tjetër kërkesë e shoqatës lidhet me akcizën e karburantit të përdorur nga operatorët e licencuar të transportit publik qytetas. Përmes ndryshimeve në legjislacionin përkatës, kërkohet krijimi i një regjimi të posaçëm që mundëson përjashtimin nga akciza të gazoilit të përdorur ekskluzivisht për këtë shërbim.

Nëse përjashtimi i drejtpërdrejtë nuk është i mundur, shoqata propozon ngritjen e një mekanizmi rimbursimi për sasitë e dokumentuara të karburantit të konsumuar gjatë ushtrimit të aktivitetit.

Sipas propozimit, rimbursimi duhet të kryhet çdo muaj ose tremujor, me afate të përcaktuara për shqyrtimin e kërkesave dhe ekzekutimin e pagesave. Përfitimi do të lidhej me faturat fiskale të furnizimit, licencat e transportit, mjetet e regjistruara dhe kilometrat e realizuar sipas programeve të miratuara.

Shoqata argumenton se operatorët e transportit publik nuk mund t’i përshtatin në mënyrë të njëanshme tarifat sipas luhatjeve të çmimit të karburantit, pasi shërbimi funksionon mbi tarifa dhe itinerare të përcaktuara. Për rrjedhojë, rritja e kostove ndikon drejtpërdrejt në qëndrueshmërinë financiare të tyre.

Shoqata kërkon gjithashtu shqyrtimin e aplikimit të një norme të reduktuar të TVSH-së prej 6% për shërbimet e transportit publik qytetas të udhëtarëve.

Kërkesa vjen në kuadër të propozimeve fiskale që, sipas dokumentit të shoqatës, parashikojnë rritjen e normës standarde të TVSH-së nga 20% në 21%. Sipas saj, transporti publik duhet të trajtohet si një shërbim me interes të drejtpërdrejtë publik dhe social, duke pasur parasysh rolin që luan në lëvizjen e përditshme të qytetarëve.

Përveç normës së reduktuar, shoqata kërkon vlerësimin e një mekanizmi të posaçëm për trajtimin e TVSH-së mbi karburantin, pjesët e këmbimit, shërbimet e mirëmbajtjes dhe investimet në mjete. Sipas saj, çdo ndryshim duhet të shoqërohet me analizën e së drejtës së kreditimit të TVSH-së së blerjeve, në mënyrë që lehtësimi të ketë efekt real në kostot e operatorëve.

Në rast se norma e reduktuar nuk rezulton e realizueshme ose efektive, propozohet shqyrtimi i një mekanizmi kompensimi buxhetor për kostot shtesë të provuara që mund të lindin nga ndryshimet fiskale./Monitor /