Nuk ndihet mirë, gjyqi në GJKKO, Veliaj kërkon shtyrjen e seancës për shkak të problemeve shëndetësore

Veliaj kërkon shtyrjen e seancës në GJKKO, pretendon se nuk përballon dot udhëtimin nga Fieri në Tiranë për shkak të këmbës
Kryebashkiaku i Tiranës, Erion Veliaj, ka kërkuar shtyrjen e seancës gjyqësore në Gjykatën e Posaçme kundër Korrupsionit dhe Krimit të Organizuar (GJKKO), duke pretenduar se dëshiron të jetë i pranishëm në proces, por gjendja e tij shëndetësore nuk ia mundëson udhëtimin nga Fieri drejt Tiranës.
Në një shkresë drejtuar gjykatës, Veliaj argumenton se për shkak të problemit me këmbën nuk është në gjendje të përballojë transportin nga burgu i Fierit drejt kryeqytetit. Ai ka bërë të ditur se dëshiron të marrë pjesë personalisht në seancë, por pretendon se kushtet fizike nuk ia lejojnë një gjë të tillë.
Në të njëjtën shkresë, kryebashkiaku ka ngritur edhe shqetësimin për dokumentacionin mjekësor. Sipas tij, nuk i janë vënë në dispozicion dokumentet që lidhen me nevojën për një ndërhyrje kirurgjikale, çka e ka bërë pjesë të argumenteve të paraqitura përpara trupës gjykuese.
Pas marrjes së kërkesës, trupa gjykuese e GJKKO-së është tërhequr në dhomën e këshillimit për të shqyrtuar pretendimet e Veliajt dhe për të vendosur nëse seanca do të vijojë apo do të shtyhet.
Vendimi i gjykatës pritet të përcaktojë nëse procesi do të zhvillohet sipas planifikimit apo nëse do të ketë një datë tjetër për seancën e radhës.
Deri në marrjen e një vendimi nga trupa gjykuese, mbetet e paqartë nëse kërkesa e kryebashkiakut do të pranohet.


