Sot mblidhen në Berlin ministrat e jashtëm të Ballkanit Perëndimor, ja qëllimi i konferencës

Një ditë më parë u bë me dije se sot, në kuadër të të procesit të Berlinit do zhvillohet konferenca e ministrave te jashtëm të Ballkanit Perëndimor. Sipas njoftimit të  zëdhënëses së zëvendës ministres së punëve të jashtme të Gjermanisë, Andrea Sasse, ky process do drejtohet nga ministri i jashtëm i Gjermanisë, Heiko Maas.

Mësohet se kjo konferencë ka si qëllim të parapërgatitë samitin e ardhshëm të krerëve të qeverive, i cili do të zhvillohet nën drejtimin e kancelares, Angela Merkel në fillim të korrikut. Zëdhënsja tha se përpos ministrave të jashtëm të vendeve të Ballkanit Perëndimor, pjesë do jenë edhe ministrat e jashtëm të disa vendeve anëtare të BE-së, si edhe Komisioneri i Zgjerimit, Olivér Várhelyi, dhe Sekretari i Përgjithshëm i Shërbimit të Veprimit të Jashtëm Evropian, Stefano Sannino.

Kujtojmë se ky proces është krijuar në 2014 nga Angela Merkel, që ka për synim përmirësimin e bashkëpunimit rajonal ndërmjet vendeve të Ballkanit Perëndimor për të mbështetur kështu procesin e anëtarësimit në BE të gjashtë vendeve: Shqipëri, Kosovë, Maqedoni e Veriut, Bosnjë-Hercegovinë, Mali i Zi dhe Serbi.