Veza e rrallë Fabergé shitet për 22.9 milionë paund, duke vendosur rekord botëror

Një nga kryeveprat më të rralla të Peter Carl Fabergé ka thyer sot çdo rekord ankandi. “Veza e Dimrit”, dikur në pronësi të nënës së perandorit të fundit rus, është shitur për 22.9 milionë paund, duke u bërë objekti më i shtrenjtë Fabergé i shitur ndonjëherë.

E porositur në vitin 1913 nga Perandori Nikolla II si dhuratë e Pashkëve, kjo vepër unike është punuar në kristal shkëmbor të gdhendur nga brenda, ndërsa jashtë shkëlqen me fjolla bore prej platini të mbushura me diamante “rose-cut”.

Është hera e tretë që kjo vezë vendos rekord botëror, falë historisë së saj të jashtëzakonshme që nis në oborrin perandorak rus dhe vazhdon me një udhëtim dramatik përtej Revolucionit të vitit 1917.

Pasi humbi për gati 20 vjet, “Veza e Dimrit” është rikthyer sot në qendër të vëmendjes, duke tërhequr koleksionistë nga e gjithë bota. Drejtoresha e departamentit të Fabergé në Christie’s e quajti shitjen “një moment historik për artin rus dhe një nga veprat më të shkëlqyera të Fabergé”.