Ndryshojnë procedurat për profesionistët e shëndetësisë: Mjekët e rinj nuk do të japin më provimet e ndërmjetme

Kryeministri Edi Rama ka njoftuar miratimin e një akti të përbashkët nga Ministria e Shëndetësisë dhe Mirëqenies Sociale dhe Ministria e Arsimit, që sjell ndryshime në procedurat për profesionistët e rinj të shëndetësisë.

Përmes një postimi në rrjetet sociale, Rama bëri të ditur se tashmë, pas përfundimit të praktikës profesionale, profesionistët e shëndetësisë do të mund t’i nënshtrohen drejtpërdrejt Provimit të Shtetit, pa kaluar më parë në procedurat e vlerësimit nga Urdhrat Profesionalë.

Nga ky ndryshim do të përfitojnë edhe ata që e kanë përfunduar praktikën profesionale, por janë ende në pritje të procedurave të vlerësimit.

Synimi i këtij vendimi është thjeshtimi i procedurave dhe shmangia e përsëritjeve administrative, duke garantuar njëkohësisht cilësinë profesionale të punonjësve të rinj.

Ky ndryshim synon të lehtësojë hyrjen e profesionistëve të rinj në sistemin shëndetësor, në mënyrë që ata të kontribuojnë më shpejt dhe me më shumë përgjegjësi në shërbim të qytetarëve.