Mbyllja e zgjedhjeve brenda PD-së, Jemin Gjana zbulon se kur do të shpallet fituesi

Pas mbylljes së procesit të zgjedhjeve brenda Partisë Demokratike, kryetari i Komisionit Zgjedhor, Jemin Gjana deklaroi se rezultati i fituesit do të shpallet nesër paradite pas orës 9:00. Ndër të tjera, Gjana ka theksuar se nuk është regjistruar asnjë incident gjatë zgjedhjeve në PD dhe se procesi ka qenë i rregullt. 

"Në kohën më të shpejtë të mundshme sapo ne të administrojmë të dhënat, do të marrim nga një fotokopje të procesverbalit të nxjerrjes së rezultatit. Do të bëjmë një përmbledhje, do t’ju jap një të dhënë operative për numrin e votave për secilin prej kandidatëve.

E dhëna zyrtare do të dalë vetëm nesër paradite, pasi ne të kemi administruar të gjitha kutitë e votimit, të cilat do të hapen në komision në praninë tuaj po të doni, nesër pas orës 09.00, do të nxirren procesverbalet, do të regjistrohen procesverbalet një përmbledhëse.

Do të shpallet rezultati zyrtar i kandidatit fitues dhe të dhënat prej secilit prej kandidatëve në garë. Janë mbyllur të gjitha degët e votimit. Nuk ka patur incidente. Presim të na deklarojnë kundrejt fotokopjeve procesverbale dhe ne do t’ju deklarojmë ju një të dhënë operative paraprake."-tha Gjana.