Michael Douglas: “E njoha Catherine Zeta-Jones në një darkë, isha tapë. Ajo më tha ‘O unë, o të tjerat’

Michael Douglas kishte pesë telefonata për të bërë. Nuk bëhej fjalë për angazhime pune, por për telefonata që do t'i shërbenin për t'i dhënë fund po aq lidhjeve. 

Kjo është një nga anekdotat e rrëfyera nga aktori – tashmë 82-vjeçar – në librin e tij me kujtime, One Helluva Ride, siç raportohet nga revista PEOPLE. Në atë kohë, Douglas sapo ishte ndarë nga gruaja e tij e parë, Diandra Luker, dhe po dilte me pesë gra që jetonin në qytete të ndryshme. Ai e shihte këtë situatë, siç tregon vetë, si një mënyrë të respektueshme për të praktikuar marrëdhëniet jo-monogame: asnjëra prej grave nuk kishte kërkuar angazhim serioz apo nuk kishte pyetur nëse ai po shihej me dikë tjetër.

Takimi me Catherine Zeta-Jones

Douglas e kishte parë për herë të parë Zeta-Jones në filmin The Mask of Zorro. Pak javë më vonë, të dy u takuan në Festivalin e Filmit Amerikan në Deauville, Francë, ku aktori po promovonte filmin A Perfect Murder. Ai mbeti i mahnitur jo vetëm nga bukuria e aktores, por edhe nga personaliteti i saj; ai e kujton atë si një grua inteligjente, gazmore, spontane dhe plot vetëbesim. Pas një darke me Antonio Banderas dhe Melanie Griffith, Douglas e shoqëroi Zeta-Jones deri te ashensori i hotelit. Ai pranon se ishte "tapë" nga alkooli kur i tha: "Unë do të bëhem babai i fëmijëve të tu." Ishte një deklaratë që, siç këmbëngul ai në libër, "nuk ishte një frazë joshëse për të bërë për vete dikë. Ishte e vërteta."

Ultimatumi dhe pesë telefonatat

Megjithatë, kur lidhja filloi të merrte një kthesë më serioze, Zeta-Jones e bëri menjëherë të qartë qëndrimin e saj. Ajo nuk ishte e interesuar të dilte me Douglas-in nëse ai vazhdonte të shihej me gra të tjera; ai mund të zgjidhte ose të vazhdonte t'i takonte ato, ose t'u jepte fund atyre lidhjeve dhe të ishte me të. Douglas e dinte tashmë se çfarë zgjedhjeje të bënte. "Prit këtu, duhet të bëj pesë telefonata," i tha ai.

Gruaja e tij e ardhshme mbeti e habitur: "Pesë? Duhet të bësh pesë telefonata?" Atë ditë, aktori telefonoi pesë gratë me të cilat po dilte, një nga një, për t'u thënë se kishte takuar dikë dhe nuk mund t'i vazhdonte më ato lidhje. "Të gjitha e pritën mirë," tregon ai. Një lidhje që zgjat prej gati 26 vitesh

Douglas dhe Zeta-Jones u martuan në vitin 1999 dhe patën dy fëmijë, Dylan dhe Carys. Aktori ka gjithashtu një djalë, Cameron, nga martesa e tij e mëparshme me Diandrën. Gati 26 vjet pas martesës së tyre, Douglas e përshkruan marrëdhënien me Catherine si diçka që shkon përtej tërheqjes: një "lidhje e veçantë", e ndërtuar mbi afërsinë dhe respektin reciprok.