Loja e futbollit që u kthye në tragjedi për shqiptarin, vijojnë hetimet për vde'kjen e 16-vjeçarit në Greqi

Hetimet për vdekjen e 16-vjeçarit me origjinë shqiptare, Gjana Asllan, janë përqendruar tashmë edhe te kushtet e sigurisë në stadiumin e Panagias, në ishullin Thasos. I mituri humbi jetën pasi pësoi një dëmtim të rëndë gjatë një ndeshjeje futbolli.

Ngjarja ndodhi të dielën, gjatë takimit ku 16-vjeçari luante me skuadrën Byronas Kavala. Vetëm pak minuta pas nisjes së ndeshjes, gjatë një aksioni për topin, ai përfundoi jashtë vijave të fushës dhe goditi pjesën e pasme të kokës në një prej strukturave rrethuese të stadiumit. 
 
Goditja rezultoi tepër e rëndë dhe futbollisti humbi ndjenjat. Atij iu dha ndihma e parë në vendngjarje, përpara se të transportohej me urgjencë në spitalin e Kavalës. Për shkak të gjendjes kritike, 16-vjeçari u vendos në terapi intensive, por pavarësisht trajtimit mjekësor, ndërroi jetë të martën, më 29 shtator.

Pas tragjedisë, hetimi nuk është kufizuar vetëm në dinamikën e përplasjes. Policia e Thasos dhe Prokuroria e Kavalës po verifikojnë nëse ambienti sportiv ku zhvillohej ndeshja plotësonte kriteret e nevojshme për mbrojtjen e futbollistëve.

Një prej elementeve që pritet të shqyrtohet është hapësira që ndante vijën anësore të fushës nga gardhi dhe strukturat e tjera përreth saj. Pikërisht në këtë pjesë të stadiumit 16-vjeçari pësoi goditjen që më pas rezultoi fatale.

Në sitën e autoriteteve pritet të kalojë edhe dokumentacioni i impiantit sportiv, përfshirë licencimin dhe masat e parashikuara për zhvillimin e aktiviteteve ku marrin pjesë të mitur. Hetuesit pritet të mbledhin dëshmi nga personat që panë momentin e aksidentit, si edhe nga përgjegjësit për organizimin e ndeshjes.

 Një rol të rëndësishëm në hetim do të kenë edhe ekspertiza mjeko-ligjore dhe rezultatet e autopsisë. Materialet do t’i vihen në dispozicion prokurorisë, e cila do të vlerësojë nëse nga rrethanat e ngjarjes mund të evidentohen përgjegjësi penale.

Vdekja e të riut ka tronditur komunitetin sportiv në Kavala. Byronas Kavala, skuadra ku aktivizohej 16-vjeçari, ka shprehur dhimbjen për humbjen e tij, ndërsa hetimet pritet të përcaktojnë nëse tragjedia ishte vetëm pasojë e një aksidenti në fushë apo nëse kushtet e sigurisë së stadiumit kanë luajtur rol në pasojat fatale.