Sulmoi ushtarët e KFOR, policia e Kosovës arreston serbin e njohur si "Rusi"

Policia e Kosovës ka arrestuar ditën e sotme një shtetas serb të dyshuar për përfshirje në dhunën ndaj trupave të KFOR-it në 29 maj në veri të Kosovës.

Mësohet se shtetasi i njohur me nofkën “Rusi” është shoqëruar nga autoritetet pas sigurimit të dëshmive se ai ka qenë pjesë e protestuesve që kanë ushtruar dhunë fizike kundrejt ushtarëve të KFOR.

“Policia e Kosovës ka bërë të ditur se ka arrestuar një të dyshuar, N.O, i njohur me nofkat “Nemac” dhe “Rusi”, si i dyshuar për përfshirje në rast të sulmit dhe rrezikimit të personave nën mbrojtje ndërkombëtare të KFOR-it”, thuhet në njoftim.

Sakaq, Policia e Kosovës njofton se do të vazhdojë angazhimin dhe përkushtimin e saj për ruajtje të rendit dhe sigurisë publike, për sundim të ligjit dhe sjelljen para organeve të drejtësisë së personave të dyshuar që bien në kundërshtim me rendin dhe ligjin.