Çfarë po ndodh me tregun amerikan të k*kainës?/ Ish-oficeri britanik zbulon rolin e bandave shqiptare

Rrjetet kriminale shqiptare kanë shtrirë aktivitetin në SHBA dhe po bashkëpunojnë me grupet braziliane. Rënia e çmimit dhe rritja e pastërtisë së kokainës janë tregues të ndryshimeve në tregun amerikan.

Grupet e krimit të organizuar shqiptar po zgjerojnë ndikimin e tyre në tregtinë ndërkombëtare të drogës dhe kanë nisur të depërtojnë edhe në tregun amerikan të kokainës.

Paralajmërimi vjen nga Neil Woods, ish-oficer i infiltruar i narkotikëve në Mbretërinë e Bashkuar, i cili kaloi 14 vite duke depërtuar në rrjetet e trafikantëve të drogës.

Në një intervistë për revistën “Newsweek”, Woods tha se grupet shqiptare kanë ndërmarrë “sulme të forta” edhe në Shtetet e Bashkuara, duke e cilësuar shtrirjen e tyre si një fenomen ndërkombëtar. Sipas tij, rënia e çmimit të kokainës dhe rritja e pastërtisë së saj në tregun amerikan janë tregues të efikasitetit të krijuar nga bashkëpunimi mes organizatave kriminale në vende të ndryshme.

“Ndërhyrjet e tyre të forta janë në thelb transglobale, që përfshin SHBA-në. Çmimi ka rënë dhe pastërtia është rritur në SHBA si kudo. Pse? Për shkak të efikasitetit të krijuar nga ky bashkëpunim transnacional”, u shpreh Woods.

Ai vuri në dukje veçanërisht lidhjet mes grupeve shqiptare dhe atyre braziliane, duke shpjeguar se një pjesë e rëndësishme e përpunimit dhe logjistikës së kokainës po realizohet përmes Brazilit, nga ku droga shpërndahet drejt destinacioneve të ndryshme, përfshirë edhe SHBA-në.

“Lidhja e rëndësishme që sjell në diskutim Amerikën është midis krimit të organizuar shqiptar dhe atij brazilian. Shumica e përpunimit dhe logjistikës tani bëhet nëpërmjet Brazilit, dhe prej andej SHBA-ja është vetëm një destinacion midis të tjerëve. Tregu vetëm sa është rritur”, deklaroi ai.

Rrjetet shqiptare kanë vepruar prej vitesh në SHBA

Sipas “Newsweek”, grupet kriminale shqiptare nuk janë një fenomen i ri në Shtetet e Bashkuara. Në vitin 2013, prokurorët federalë në Nju Jork njoftuan dënimin e 49 anëtarëve dhe bashkëpunëtorëve të një sindikate ndërkombëtare kriminale shqiptare, e cila vepronte në tre kontinente dhe shpërndante drogë në disa shtete amerikane.

Rrjeti kishte shtrirje në Nju Jork, Kaliforni, Xhorxhia, Kolorado dhe Florida.

Sipas Departamentit amerikan të Drejtësisë, anëtarët e tij trafikonin kokainë të siguruar nga Meksika dhe Amerika e Jugut, si dhe marihuanë, ekstazi dhe medikamente me recetë.

Edhe Departamenti amerikan i Shtetit ka identifikuar rrjete kriminale të drejtuara nga shqiptarë që operojnë në SHBA, Evropë, Emiratet e Bashkuara Arabe dhe Amerikën e Jugut.

Të dhënat e Administratës Amerikane për Zbatimin e Ligjit kundër Drogave (DEA) duket se përputhen me vëzhgimet e Woods për rritjen e pastërtisë së kokainës. Në raportin kombëtar të kërcënimit nga droga për vitin 2025 thuhet se pastërtia mesatare e mostrave të kokainës të analizuara në nivelin e shitjes me shumicë u rrit nga 86% në vitin 2023 në 88% në vitin 2024.

Paralajmërimi i Woods vjen në prag të publikimit të dokumentarit të Sky News, “The Drug Lords Next Door”, i cili trajton mënyrën se si rrjetet shqiptare të drogës kanë ndërtuar zinxhirë ndërkombëtarë furnizimi dhe kanë zhvilluar struktura të sofistikuara shpërndarjeje në Britani.

 Hetimi njëvjeçar i gazetarëve të Sky News zbuloi qindra reklama në TikTok, përmes të cilave ofroheshin vende pune për shpërndarjen e drogës në qytete të ndryshme britanike. Gazetarët aplikuan në mënyrë të fshehtë dhe iu ofruan punë për shitjen e kokainës, përfshirë një pozicion me pagesë prej 280 paundësh në ditë.

Ish-oficeri i policisë David McKelvey, i cili ka marrë pjesë në operacione kundër bandave shqiptare në Britani, e krahasoi këtë mënyrë organizimi me funksionimin e një kompanie të madhe që reklamon dhe rekruton punonjës.

Dokumentari zbulon gjithashtu përdorimin e telefonave të dedikuar, ku ruhen kontaktet dhe të dhënat e klientëve. Sipas hetimit, këta telefona mund të shiten për shuma deri në 300 mijë paund, duke i dhënë blerësit jo vetëm një pajisje, por edhe një rrjet të konsoliduar klientësh.

“Telefoni është biznesi. Të gjithë klientët tuaj janë në telefonin tuaj. Ju praktikisht po blini një biznes”, shpjegoi McKelvey.