Jashtëtokësori me tentakula shfaqet mbi bazën ushtarake, dëshmitarët mbeten pa fjalë

Një objekt misterioz fluturues, me pamjen e një kandili gjigant deti, është filmuar në qiellin e Alaskës, pranë një baze të rëndësishme ushtarake amerikane. Objekti u shfaq për disa minuta dhe më pas u zhduk papritur, duke lënë të habitur dy dëshmitarët që e panë.

Ngjarja ka ndodhur në qytetin Anchorage. Sara Jane Osborn po fotografonte një ylber nga makina, kur vuri re një formë të errët që lëvizte mbi pemët në distancë.

Fillimisht mendoi se bëhej fjalë për një insekt që kishte dalë në fotografi, por kur e pa më mirë, kuptoi se objekti ishte shumë më i madh. Ajo nisi ta fotografonte dhe ta filmonte, ndërsa bashkëshorti i saj, Pete, konfirmoi se edhe ai e kishte vënë re.

Sipas dëshmitares, objekti kishte ngjyrë të zezë dhe argjendtë, me disa pjesë të varura që lëviznin në mënyrë të pavarur. Ai qëndronte pezull në ajër dhe ndryshonte drejtim, ndërsa u zhduk pas rreth tre minutash.

Çifti dyshon se objekti ndodhej në drejtim të bazës ushtarake Joint Base Elmendorf-Richardson, ku janë të dislokuara edhe avionët luftarakë F-22 Raptor. Megjithatë, nuk ka prova që objekti të ketë pasur lidhje me bazën.

Vetë Osborn pranoi se mund të bëhej fjalë edhe për një dron, por lëvizjet dhe pamja e pazakontë e objektit e kanë lënë pa një shpjegim të qartë.

Deri më tani, nuk ka konfirmim zyrtar për natyrën e objektit dhe asnjë provë që të bëhet fjalë për një fenomen jashtëtokësor.