Franca në kaos total, protestat mbyllin 500 shkolla, mbi 5 mijë të arrestuar

Deri në 500 shkolla në Francë pritet të mbyllen pjesërisht ose plotësisht të hënën, pas përshkallëzimit të protestave të nxënësve dhe përleshjeve me policinë.

Ministri francez i Arsimit, Edouard Geffray, tha se në rreth 400–500 gjimnaze mësimi do të pezullohet përkohësisht, pasi kushtet e sigurisë nuk konsiderohen të përshtatshme. Sipas tij, që nga nisja e protestave, 24 shkolla janë djegur ose dëmtuar rëndë.

Protestat nisën javën e kaluar në Paris dhe më pas u përhapën edhe në qytete të tjera, përfshirë Montpellier, Nantes dhe Marseille. Nxënësit kundërshtojnë mungesën e mësuesve, klasat e mbipopulluara dhe gjendjen e dobët të godinave shkollore.

Ministri i Drejtësisë, Gerald Darmanin, deklaroi të premten se 735 nga rreth 3,700 shkolla në vend ishin prekur në një mënyrë ose në një tjetër nga protestat e dhunshme.

Sipas Geffray, 78 punonjës të arsimit janë plagosur, ndërsa ai paralajmëroi se situata përbën rrezik si për stafin, ashtu edhe për nxënësit. Ministri akuzoi gjithashtu persona që ai i përshkroi si aktivistë, veçanërisht nga e majta radikale, se kanë ndërhyrë në lëvizjen studentore dhe se kanë nxitur dhunën.

Vetëm të premten, sipas ministrit të Brendshëm Laurent Nunez, u arrestuan 1,747 persona. Në total, sipas AFP-së, që nga fillimi i protestave janë arrestuar më shumë se 5,000 persona, rreth 85% e tyre të mitur.

Organizatorët kanë bërë thirrje që protestat të vijojnë edhe të martën, duke e akuzuar qeverinë për mungesë të masave konkrete.

Ndërkohë, kryeministri francez Sebastien Lecornu tha se qeveria po ndërmerr hapa për të adresuar problemet e nxënësve dhe stafit arsimor. Masat përfshijnë garantimin e zhvillimit të mësimit, përmirësimin e ambienteve shkollore, organizimin e ditës mësimore dhe rritjen e transparencës së platformës së pranimeve universitare.

Qeveria po përshpejton gjithashtu shqyrtimin e një projektligji të njohur si “vandal pays”, i cili synon që personat përgjegjës për dëmet materiale të mbajnë koston e shkaktuar.