VIDEO/ I afrohet tavolinës dhe e qëll*n në mes të ditës, dalin pamjet e vr*sjes së shqiptarit në Spanjë

Janë publikuar pamjet e momentit të ekzekutimit të shqiptarit Luka Beqiraj në Spanjë, i cili u vra me armë zjarri në mes të ditës, teksa ndodhej në tarracën e një lokali brenda një kompleksi sportiv në Orihuela Costa, në provincën e Alicantes.
Atentati ndodhi më 10 nëntor, pak para orës 13:00, në ambientet e kompleksit Playa Flamenca Sport Club. Videoja tregon momentin kur autori i afrohet tavolinës ku qëndronte 39-vjeçari nga Vlora dhe hap zjarr në drejtim të tij.
Në pamjet e shpërndara nga gazetari Artan Hoxha, dallohen edhe personat e tjerë që ndodheshin në tavolinë, të cilët largohen me vrap menjëherë pas të shtënave, në përpjekje për t’i shpëtuar sulmit.
Pas sulmit, autori u largua nga vendngjarja me një monopatinë elektrike, ndërsa 39-vjeçari ndërroi jetë si pasojë e plagëve të marra.
Deri në raportimet e fundit, autori vijonte të ishte në kërkim nga autoritetet spanjolle. Mënyra e organizimit dhe ekzekutimit të atentatit ka ngritur dyshime te hetuesit se mund të bëhet fjalë për një vrasje me pagesë dhe larje hesapesh.
Sipas mediave spanjolle, po verifikohen edhe lidhjet e mundshme të ngjarjes me rrjetet e krimit të organizuar që veprojnë në zonat bregdetare të Alicantes dhe Mursias. Megjithatë, motivi i vrasjes nuk është konfirmuar zyrtarisht.
Luka Beqiraj nuk ishte një emër i panjohur për autoritetet shqiptare. Në vitin 2016 ai u arrestua në Vlorë për plagosje të rëndë me dashje.
Në vitin 2019 u arrestua në kuadër të një operacioni të përbashkët shqiptaro-italian kundër trafikut ndërkombëtar të drogës, ndërsa në vitin 2020 u dënua nga drejtësia italiane me 4 vite e 6 muaj burgim për përfshirjen në veprimtari të lidhura me trafikun e narkotikëve.
E kaluara e tij kriminale është një nga elementet që po rikthehen në vëmendje pas atentatit, ndërsa hetuesit spanjollë vijojnë punën për identifikimin dhe kapjen e autorit, si dhe për zbardhjen e plotë të motiveve që çuan në vrasjen e shqiptarit.


