Dushi para gjumit nuk është vetëm relaks, ja si ndikon në cilësinë e gjumit

Një dush ose banjë e ngrohtë para gjumit mund t'ju ndihmojë të flini më shpejt dhe të përmirësoni cilësinë e gjumit.
Sipas një analize të studiuesve nga Universiteti i Teksasit në Austin, mjaftojnë vetëm 10 minuta në ujë të ngrohtë për të pasur rezultate pozitive.
Studimi, i publikuar në revistën shkencore Sleep Medicine Reviews në vitin 2019, analizoi të dhënat e 17 studimeve mbi lidhjen mes temperaturës së ujit dhe gjumit.
Rezultatet treguan se një banjë ose dush me temperaturë nga 40 deri në 42.5 gradë Celsius, i bërë një deri në dy orë para gjumit, mund të shkurtojë kohën që i nevojitet trupit për të fjetur.
Koha më e përshtatshme është rreth 90 minuta para se të shkoni në shtrat. Sipas studiuesve, kjo mund t'ju ndihmojë të bini në gjumë mesatarisht 10 minuta më shpejt.
Por pse funksionon kjo metodë?
Temperatura e trupit fillon të ulet natyrshëm rreth një orë para gjumit. Ky proces është i rëndësishëm për të fjetur më shpejt dhe për të pasur një gjumë cilësor.
Uji i ngrohtë ndihmon në aktivizimin e mekanizmave të rregullimit të temperaturës. Ai nxit qarkullimin e gjakut drejt duarve dhe këmbëve, duke ndihmuar trupin të çlirojë nxehtësinë dhe të ulë temperaturën e brendshme.
Kështu, një dush i ngrohtë në mbrëmje mund të jetë një mënyrë e thjeshtë për ta përgatitur trupin për një gjumë më të mirë.


