Dhu'na vijon të jetë shkaku kryesor i divorceve në Shqipëri, urdhrat e mbrojtjes mbeten në letër
Dhuna ndaj bashkëshortes apo bashkëshortit vijon të jetë shkaku kryesor i divorceve, pavarësisht viteve që kalojnë dhe masave ligjore të marra për mbrojtjen e viktimave.
Në Durrës, numri i divorceve rritet nga viti në vit. Në njërën anë, shihet si një zhvillim pozitiv ndërgjegjësimi i grave, të cilat nuk pranojnë më të durojnë dhunën për hir të familjes. Nga ana tjetër, mbetet shqetësues fakti se pikërisht dhuna vijon të jetë arsyeja kryesore e ndarjeve.
Sipas avokates, ka pasur raste kur bashkëshortja është tërhequr në momentin e fundit nga kërkesa për divorc, pasi partneri ka shfaqur pendesë dhe ka premtuar se sjellja e tij do të ndryshojë. Por në shumë raste, vetëm pas 3 apo 4 muajsh, dhuna është rikthyer dhe bashkëshortja është detyruar të nisë sërish procedurat e divorcit.
Problematike mbetet edhe zbatimi i legjislacionit për mbrojtjen e viktimave të dhunës në familje. Ndonëse kuadri ligjor konsiderohet i mirë në letër, në praktikë ai nuk jep rezultatet e pritshme. Sipas avokates, urdhrat e mbrojtjes shoqërohen me problematika të shumta në zbatimin e tyre nga institucionet përgjegjëse.
Ndërkohë, një pjesë e konsiderueshme e proceseve të divorceve shoqërohen edhe me çështje penale, kryesisht për dhunë në familje. Një tregues ky i problematikave që vijojnë të shoqërojnë trajtimin e këtij fenomeni, i cili mbetet një shqetësim serioz për shoqërinë shqiptare.


