Dëgjon zërin e motrës që po i ndërron jetë- Ngjarja e pazakontë në Big Brother

Një ngjarje e ndodhur gjatë edicionit të dytë të “Big Brother Brasil” në vitin 2002 është rikthyer së fundmi në vëmendjen e përdoruesve të rrjeteve sociale.
Bëhet fjalë për një moment të regjistruar gjatë qëndrimit të konkurrentes Cida Moraes në shtëpi, i cili më vonë mori një kuptim tragjik.

Në pamjet e arkivuara që po qarkullojnë sërish në internet, Cida shihet duke pushuar në kopshtin e shtëpisë kur ngrihet e habitur pasi pretendon se dikush po e thërret me emër.

Gjatë bisedës me banorët e tjerë, ajo tregoi se kishte dëgjuar zërin e motrës së saj, Gloria, ndërsa një prej pjesëmarrësve u përpoq ta qetësonte duke i thënë se kishte qenë ai që e kishte thirrur.
 
Në ato momente, konkurrentja ndodhej në izolim të plotë dhe nuk kishte asnjë informacion për zhvillimet jashtë shtëpisë. Pikërisht gjatë asaj kohe, motra e saj kishte ndërruar jetë, pa pasur asnjë dijeni vetë konkurrentja.

Pasi u njoftua nga produksioni për humbjen e të motrës, Cida vendosi të vazhdonte qëndrimin në show. Ajo vazhdoi rrugëtimin e saj deri në finale, ku u rendit në vendin e tretë.
 
Rikthimi i kësaj videoje pas më shumë se dy dekadash ka nxitur sërish diskutime në rrjetet sociale rreth përkimit të atij momenti me ngjarjen familjare.