Nuk arritën në kohë për fluturimin, dy gratë futen me vrap në pistë për të ndaluar avionin (VIDEO)

Një incident i pazakontë shkaktoi alarm në aeroportin ndërkombëtar Sheremetyevo të Moskës, pasi dy gra hynë në zonën e kufizuar të pistës në përpjekje për të kapur një avion të Aeroflot, të cilin e kishin humbur.

Ngjarja ndodhi më 25 korrik, ndërsa avioni po përgatitej të largohej nga porta. Pamjet e publikuara nga aeroporti tregojnë dy gratë duke vrapuar në pistë me bagazhet e tyre, ndërsa njëra prej tyre duket se i bën me dorë avionit, në përpjekje për të tërhequr vëmendjen e pilotit dhe për ta bindur ekuipazhin të ndalojë.

Sipas raportimeve lokale, gratë kishin mbërritur me vonesë dhe kishin humbur afatin e imbarkimit. Në vend që të riktheheshin në terminal për të riorganizuar udhëtimin, ato dyshohet se u futën në zonën e kufizuar të aeroportit. Të dyja kishin kaluar më herët kontrollet e sigurisë dhe ndodheshin brenda zonës së sigurt.

Punonjësit e aeroportit i vunë re pranë avionit dhe ndërhynë menjëherë për të ndaluar operacionin. Gratë u shoqëruan drejt terminalit dhe më pas iu dorëzuan Shërbimit Federal të Sigurisë së Rusisë (FSB).

Incidenti përbënte një rrezik serioz për sigurinë, pasi zona e pistës është e kufizuar dhe aty lëvizin avionë, mjete të shërbimit dhe punonjës të aeroportit. Për shkak të pranisë së grave në pistë, operacioni për lëvizjen e avionit u ndërpre përkohësisht.

Pamjet e ngjarjes u përhapën me shpejtësi në rrjetet sociale. Ky nuk është rasti i parë i një pasagjeri në Rusi që përpiqet të ndalojë një avion pasi ka humbur fluturimin. Në maj, një tjetër pasagjer, i cili kishte humbur fluturimin pasi ishte bllokuar në tualetin e aeroportit, dyshohet se kishte dalë në pistë për të ndaluar avionin, por pa sukses. Më pas ai raportohet se u gjobit me rreth 30 paund.