Arrestohen 5 persona në Greqi, dyshohet se do të kryenin sulm terrorist

Një komplot i dyshuar për vrasje në Greqi, me lidhje të mundshme me shërbimet iraniane të sigurisë, është zbuluar nga autoritetet e Greqisë dhe Maqedonisë së Veriut.
Reuters raporton se, pesë persona janë arrestuar në kuadër të një operacioni të përbashkët mes dy vendeve. Lajmi është bërë i ditur të martën nga Agjencia e Sigurisë Kombëtare e Maqedonisë së Veriut dhe zyrtarë të inteligjencës greke.
Sipas autoriteteve maqedonase, hetimet zbuluan një rrjet personash që, nën udhëzimet e një shtetasi iranian, dyshohet se po planifikonin të kryenin një atentat në Greqi. Identiteti i objektivit të sulmit nuk është bërë publik
Hetimi, i zhvilluar në bashkëpunim me shërbimin grek të inteligjencës, ka arritur në përfundimin se shtetasi iranian kishte lidhje me shërbimet iraniane të sigurisë, si dhe me një person të njohur në botën e krimit, i cili dyshohet se ndihmoi në rekrutimin e personave që do të realizonin atentatin.
Sipas zyrtarëve grekë të sigurisë, një shtetas i Maqedonisë së Veriut u arrestua në Greqi më 12 nëntor dhe më pas u ekstradua në vendin e tij. Pas këtij zhvillimi, autoritetet maqedonase ndërmorën operacionin për arrestimin e katër personave të tjerë.
Një zyrtar i inteligjencës greke bëri të ditur se njëri prej të arrestuarve në Maqedoninë e Veriut mund të ketë zbuluar detaje mbi takimin me shtetasin iranian dhe planet për realizimin e atentatit.
Sipas autoriteteve greke, të dyshuarit kishin precedentë penalë dhe kishin udhëtuar drejt Iranit, ku ishin takuar me personin që dyshohet se koordinonte operacionin.
Agjencia e Sigurisë Kombëtare e Maqedonisë së Veriut deklaroi se që nga fillimi i vitit 2026 kishte ndërmarrë veprime për të identifikuar planet e individëve të lidhur me aktorë të huaj dhe iranianë, të dyshuar për përgatitjen e akteve terroriste.


