Tentoi të kalojë në kufi 6 emigrantë të paligjshëm, pranga 40-vjeçarit në Gjirokastër

Policia e Gjirokastrës ka arrestuar një 40-vjeçar, pasi u kap duke kaluar në kufi 6 emigrantë të paligjshëm. Mësohet se shtetasi në fjalë do merrte 200 euro për person.

“Gjirokastër/ Goditet një tjetër rast i tentativës për dhënie ndihmë për kalim të paligjshëm të kufirit, kundrejt fitimit. U kap duke ndihmuar 6 emigrantë të paligjshëm, kundrejt fitimit, bie në pranga 40-vjeçari. Sekuestrohet një automjet dhe një aparat celular. 

Shërbimet e Policisë Kufitare Kakavijë, në bashkëpunim me shërbimet e FRONTEX-it dhe Seksionin për Hetimin e Trafiqeve në DVP Gjirokastër, pas informacioneve të siguruara në rrugë operative, arrestuan në flagrancë shtetasin A. Gj., 40 vjeç, banues në Tiranë.

Shtetasi A. Gj. u kap në vendin e quajtur "Ura e lumit" duke transportuar me automjetin tip "Benz",  6 emigrantë  të paligjshëm nga vendet e treta, në drejtim të Tiranës, kundrejt fitimit 200 euro për person. Në cilësinë e provës materiale u sekuestrua një automjet dhe një aparat celular.

Materialet i kaluan Prokurorisë pranë Gjykatës së Shkallës së Parë Gjirokastër, për veprime të mëtejshme, për veprën penale “Ndihma për kalim të paligjshëm të kufijve”.”, njofton policia.