Vr'asja e 19-vjeçares, njerku u filmua duke hyrë në apartament, dyshohet për "fiksim" sek'sual

Pamjet e kamerave të sigurisë dhe provat e paraqitura në gjykatë kanë zbuluar detaje tronditëse nga vrasja e studentes 19-vjeçare Carla Georgescu, në Preston të Anglisë. Për krimin akuzohet njerku i saj, Nathan Owens, 34 vjeç, i cili dyshohet se kishte zhvilluar një obsesion seksual ndaj të resë dhe se e vrau pasi mësoi se ajo do të takohej me një person të njohur në internet.

Gjatë seancës gjyqësore të së premtes, jurisë iu shfaqën pamje ku Owens shihet i mbështjellë me një batanije, teksa mbërrin në apartamentin e Carlës rreth orës 04:00 të mëngjesit. E reja, e veshur me pizhame dhe një rrobë shtëpie, zbret shkallët për t’i hapur derën. Pasi hyn në ndërtesë, Owens duket se shikon drejt kamerës, përpara se Carla ta shoqërojë në dhomën e saj.

Sipas të dhënave të paraqitura në gjykatë, Owens ishte larguar gjatë natës nga banesa në Hartlepool, ku jetonte me nënën e Carlës, Janinën. Prokuroria pretendon se ai e vrau të renë brenda rreth 90 minutash. Më pas u largua nga apartamenti duke mbajtur një ombrellë, maskë për fytyrën, atletet e Carlës dhe dy çanta.

Raporti i autopsisë zbuloi se Carla kishte pësuar dy goditje të rënda në kokë, prerje në faqe, si dhe lëndime e mavijosje në gojë dhe hundë. Duart e saj ishin të mbuluara me gjak, ndërsa dëmtimet e konstatuara përputheshin me përpjekjet për t’u mbrojtur nga sulmi.

Gjykata dëgjoi gjithashtu se në trupin e vajzës ishin konstatuar lëndime që përputheshin me abuzim seksual. Në vendin e ngjarjes u gjetën lodra seksuale dhe ADN-ja e të akuzuarit. Sipas prokurorisë, krimi mund të jetë nxitur nga xhelozia seksuale, pasi Owens kishte mësuar se Carla, vajza e tij e adoptuar, planifikonte të takohej me një burrë që kishte njohur në internet.

Gjatë procesit u përmendën edhe dyshime se Owens kishte mbledhur fotografi të Carlës pa dijeninë e saj dhe kishte manipuluar fotografi të zakonshme të vajzës për t’i kthyer në imazhe seksuale.

Sipas raportimeve, ai kishte parë imazhe të tilla rreth një javë përpara vdekjes së saj. Po ashtu, raportohet se kishte përdorur kukulla seksuale, përfshirë një kukull në përmasa reale të veshur me këmishën e natës së Carlës.

Pas kthimit në shtëpi, Owens u soll sikur gjithçka ishte normale. Ndërkohë, trupi i Carlës u gjet pranë derës së dollapit, me dëmtime në fytyrë dhe një rrip të lidhur rreth saj. Nëna e saj ngriti alarmin pasi vajza nuk iu përgjigj telefonatave dhe mesazheve.

Carla u gjet e vdekur në ditën kur do të mbushte 20 vjeç. Fillimisht, policia e njoftoi Janinën se vajza ishte gjetur e varur. Nëna mësoi se Owens kishte vizituar apartamentin e Carlës vetëm pasi kontaktoi morgun e spitalit.

Sipas dëshmisë së paraqitur në gjykatë, ai e pranoi vizitën vetëm më pas dhe pretendoi se Carla i kishte kërkuar t’i sillte të brendshme për problemet me mosmbajtjen urinare dhe ta ndihmonte të rregullonte dhomën.

Prokuroria e kundërshton këtë shpjegim, duke pretenduar se ai po përpiqej të mbulonte gjurmët e krimit. Procesi gjyqësor ndaj Nathan Owens vijon, ndërsa akuzat ndaj tij mbeten për t’u shqyrtuar nga gjykata.