VIDEO/ “Pacientët po presin, ndërsa ju bëni s*ks”- kryebashkiaku kap mat dy mjekë gjatë turnit të natës

Një ngjarje e pazakontë është regjistruar në Brazil, ku kryebashkiaku i një qyteti ka hyrë papritur në një spital për të verifikuar ankesat e qytetarëve për pritjet e gjata të pacientëve. Gjatë kontrollit, ai ka gjetur dy mjekë të turnit të natës të mbyllur në një dhomë, duke i akuzuar se po kryenin marrëdhënie seksuale gjatë orarit të punës.

Ngjarja ndodhi mbrëmjen e 4 nëntorit në qytetin Barreiros, në shtetin Pernambuco të Brazilit. Kryebashkiaku Carlinhos da Pedreira vizitoi pa paralajmërim spitalin bashkiak “Jailton Messias de Albuquerque”, pas ankesave të shumta për vonesat në trajtimin e pacientëve.

Kontrolli dhe përplasja me dy mjekët u filmuan nga personat që shoqëronin kryebashkiakun, ndërsa pamjet kanë tërhequr vëmendje të madhe.

Pacientët prisnin në urgjencë, dy mjekët ishin mbyllur në dhomë

I shoqëruar nga bashkëpunëtorët e tij, kryebashkiaku inspektoi repartin e urgjencës dhe korridoret e spitalit, ku konstatoi se disa pacientë prisnin ende për t’u vizituar.

Më pas, ai u drejtua drejt ambienteve ku qëndronin mjekët e turnit dhe gjeti një dhomë pushimi me derën të mbyllur me çelës.

Pasi kërkoi hapjen e derës, brenda saj gjeti dy mjekë, një burrë dhe një grua.

Kryebashkiaku i akuzoi se kishin kryer marrëdhënie intime gjatë orarit të shërbimit, ndërkohë që pacientët prisnin të merrnin ndihmë mjekësore.

“Urgjenca është plot, ndërsa ju flini dhe bëni seks”

Në videon e publikuar nga kontrolli, kryebashkiaku shfaqet tepër i revoltuar, duke u kërkuar llogari dy mjekëve për sjelljen e tyre.

“Urgjenca është plot, ndërsa ju këtu flini dhe bëni seks”, u shpreh ai, sipas raportimeve për ngjarjen.

Kryebashkiaku pretendoi se atë mbrëmje në spital ishin në shërbim gjithsej tre mjekë, por në momentin e kontrollit vetëm njëri prej tyre po vizitonte pacientët.

Pas konstatimit, ai kërkoi largimin e dy mjekëve nga spitali, si dhe njoftimin e policisë për të ndërhyrë në vendngjarje.

Bashkia ndërpret kontratën me kompaninë që administronte spitalin

Ngjarja shkaktoi reagime të menjëhershme nga autoritetet bashkiake të Barreirosit, të cilat njoftuan ndërprerjen e kontratës me organizatën “Associação Beneficente João Paulo II”, që kishte marrë përsipër administrimin e spitalit.

Sipas njoftimit zyrtar, administrimi i institucionit shëndetësor do të kalojë përkohësisht drejtpërdrejt në varësi të bashkisë, deri në zhvillimin e një procedure të re tenderimi për përzgjedhjen e subjektit që do të menaxhojë spitalin.

Bashkia theksoi se përparësi mbetet garantimi i vazhdimësisë së shërbimeve shëndetësore për qytetarët, pa lejuar që ndryshimet administrative të ndikojnë në funksionimin e spitalit.

Reagon Urdhri i Mjekëve: “Është e papranueshme poshtërimi publik i mjekëve”

Rasti ka nxitur reagimin edhe të Këshillit Rajonal të Mjekësisë në Pernambuco (Cremepe), i cili më 5 nëntor publikoi një deklaratë lidhur me mënyrën se si kryebashkiaku i bëri publike akuzat ndaj dy mjekëve.

Këshilli theksoi se ankesat për problemet në funksionimin e spitalit, vonesat në trajtimin e pacientëve dhe shkeljet e mundshme gjatë turneve të shërbimit duhet patjetër të hetohen.

Megjithatë, sipas tij, kontrollet dhe verifikimet duhet të kryhen përmes procedurave ligjore dhe institucionale.

Organizata profesionale e cilësoi të papranueshëm poshtërimin publik të mjekëve, duke nënvizuar se çdo shkelje e mundshme disiplinore duhet të shqyrtohet duke respektuar të drejtën e personave të përfshirë për t’u mbrojtur.