Tiranë, shpërthim me tritol në derën e banesës së gruas së divorcuar

Një shpërthim me lëndë plasëse ka ndodhur në orët e fundit në Tiranë, ku objektiv ka qenë dera e hyrjes së një banese në një pallat. Ngjarja ka shkaktuar panik te banorët e zonës, ndërsa fatmirësisht nuk raportohet për persona të lënduar.

Nga të dhënat paraprake, bëhet me dije se sasia e tritolit ka shpërthyer në derën e banesës së një gruaje të divorcuar, e cila jetonte së bashku me dy djemtë e saj.

Si pasojë e shpërthimit janë shkaktuar vetëm dëme materiale, ndërsa ende nuk dihen rrethanat dhe motivet që mund të kenë çuar në vendosjen e lëndës plasëse.

Nuk ka ende informacion nëse gruaja apo familjarët e saj kanë pasur konflikte të mëparshme që mund të lidhen me ngjarjen.

Policia ka nisur hetimet për të zbardhur dinamikën e shpërthimit, për të identifikuar autorët dhe për të zbuluar nëse bëhet fjalë për një akt intimidimi apo për ndonjë konflikt të mëparshëm.

Grupi hetimor pritet të mbledhë dëshmi nga banorët e pallatit dhe të verifikojë pamjet e kamerave të sigurisë në zonë, me qëllim identifikimin e personave që mund të kenë vendosur lëndën plasëse.

Hetimet vijojnë për zbardhjen e plotë të ngjarjes.