Rama mbledh sot socialistët në Lalëz, ndryshime në qeveri dhe kandidatë të rinj për bashkitë?

Partia Socialiste mbledh sot, në orën 10:30, Asamblenë Kombëtare në Lalëz. Në fokus pritet të jenë përgatitjet për zgjedhjet vendore të 9 majit 2027, riorganizimi i strukturave partiake, përzgjedhja e kandidatëve për kryebashkiakë dhe zhvillimet brenda vetë PS-së.

Mbledhja do të nisë në orën 10:30 dhe do të zhvillohet në një resort në Gjirin e Lalëzit, në Durrës. Takimi pritet të hapet me fjalën e kryeministrit dhe kryetarit të PS-së, Edi Rama, për të vijuar më pas me diskutimet mbi organizimin dhe objektivat politike të socialistëve.

Një prej çështjeve kryesore në fokus do të jetë përgatitja për zgjedhjet vendore të 9 majit 2027. Rama pritet të prezantojë drejtimet mbi të cilat do të organizohet gara elektorale, si dhe mënyrën e përzgjedhjes së kandidatëve socialistë për drejtimin e bashkive.

Kandidatët për Tiranën dhe Shkodrën – Një nga pikëpyetjet kryesore lidhet me kandidaturat për bashkitë e mëdha, veçanërisht Tiranën dhe Shkodrën.

Në ditët e fundit, gazetari i Top Channel, Muhamed Veliu, ka raportuar për disa emra që po diskutohen në qarqet politike. Për Tiranën është përmendur emri i Ervin Demos, ndërsa për Shkodrën ai i Enea Karakaçit, i cili mund të përballet me Kliti Hotin.

Sipas këtyre raportimeve, në diskutim është edhe mundësia që disa ministra të lënë postet qeveritare për t’u angazhuar në garën për drejtimin e bashkive.

Megjithatë, deri më tani nuk ka një konfirmim zyrtar për kandidaturat dhe mbetet për t’u parë nëse Rama do të japë sinjale konkrete gjatë fjalës së tij.

Erion Veliaj – Një tjetër çështje që pritet të tërheqë vëmendjen është marrëdhënia mes kryeministrit Edi Rama dhe kryebashkiakut të Tiranës, Erion Veliaj.

Ky i fundit, i cili ndodhet në paraburgim në Fier, i ka dërguar një kërkesë sekretarit të Përgjithshëm të PS-së, Blendi Klosi, dhe SPAK-ut, për t’i mundësuar pjesëmarrjen në mbledhjen e Asamblesë, fizikisht ose përmes videokonferencës.

Prej ditësh kryebashkiaku ka lëshuar një seri deklaratash, duke pretenduar se urdhrin për transferimin në Fier e ka dhënë Rama, teksa ai është shprehur edhe mbi takimin me ministrin Gogu në burg, duke pretenduar se i është dhënë ultimatum që të delegojë drejtimin e bashkisë.

Ndryshime në qeveri? – Një tjetër pikëpyetje lidhet me mundësinë e ndryshimeve në kabinetin qeveritar.

Asambleja e shtatorit 2023 u përdor nga Edi Rama për të prezantuar një riorganizim të rëndësishëm të qeverisë. Për këtë arsye, vëmendja është edhe te mundësia që kryeministri të shfrytëzojë mbledhjen e sotme për ndryshime në kabinetin e tij të katërt.

Mocioni i Elisa Spiropalit – Në mbledhjen e sotme pritet të shihet gjithashtu nëse do të trajtohet mocioni i Elisa Spiropalit, përmes të cilit ajo ka kërkuar hapjen e Partisë Socialiste dhe një qasje të re politike, të artikuluar përmes propozimit për një “Marrëveshje të Re për Shqipërinë”.

Asambleja zhvillohet në një moment kur mazhoranca përballet me presionin e protestave të muajve të fundit, përfshirë protestat studentore dhe zhvillimet e tjera politike në vend.

Përveç përgatitjeve për zgjedhjet vendore, pritet që Rama të përcjellë mesazhe për mobilizimin e strukturave socialiste dhe organizimin e partisë në 46 bashkitë e vendit.

Mbetet për t’u parë nëse Asambleja e sotme do të prodhojë vetëm orientime politike për muajt në vijim apo edhe vendime konkrete për drejtuesit, kandidatët dhe kabinetin qeveritar.