Skandal në futbollin shqiptar/ Dh*në në tunelin e stadiumit, lojtarët e Kukësit sulmohen nga futbollistët dhe stafi i Orikut

Një incident i rëndë është regjistruar këtë të diel në futbollin shqiptar, gjatë ndeshjes mes Orikut dhe Kukësit, e vlefshme për Kategorinë e Parë. Në pushimin mes dy pjesëve, lojtarët dhe pjesëtarë të stafit të Kukësit janë dhunuar në tunelin e stadiumit nga futbollistë dhe pjesëtarë të ekipit vendas.
Sipas informacioneve paraprake, gjithçka ka nisur me një debat verbal, i cili më pas ka degraduar në përplasje fizike. Në tunelin që lidh dhomat e zhveshjes, lojtarët dhe stafi i Orikut dyshohet se janë përfshirë në sulmin ndaj skuadrës mike, duke shkaktuar disa minuta kaos. Në vendngjarje ka ndërhyrë edhe policia për të qetësuar situatën.
Fotot e siguruara nga “Panorama Sport” tregojnë se disa prej lojtarëve të Kukësit kanë pësuar dëmtime fizike, ndërsa në trup u dallohen shenja goditjesh dhe shkelmash.
Një tjetër element që ngre pikëpyetje lidhet me kamerat e sigurisë së stadiumit. Pavarësisht se ngjarja ka ndodhur në një ambient të mbikëqyrur nga kamerat e brendshme, këto të fundit raportohet se janë deklaruar të fikura dhe jofunksionale.
Ngjarja pritet të ngrejë shqetësime për sigurinë në aktivitetet sportive dhe përgjegjësinë e organizatorëve për parandalimin e episodeve të tilla të dhunës.


