Shqiptari vodhi kasafortën 400 kg në Belgjikë, bën deklaratën: Nuk isha vetvetja

Një 24-vjeçar shqiptar, i identifikuar me inicialet A.N., ka kërkuar një dënim më të butë në Gjykatën e Apelit në Gent të Belgjikës, pasi në shkallën e parë u dënua me 30 muaj burg për vjedhjen e një kasaforte që përmbante sende me vlerë të madhe.

Ngjarja ndodhi në banesën e një gruaje që ndodhej me pushime. Kur vëllai i saj shkoi për të ujitur lulet, zbuloi se shtëpia ishte bërë rrëmujë dhe kasaforta, e cila peshonte plot 400 kilogramë, ishte zhdukur.

Në kasafortë ruheshin medalje të vjetra ushtarake, unaza fejese, bizhuteri me vlerë deri në 50 mijë euro, si dhe albume fotografike.

I dyshuari u identifikua dhe u arrestua pas analizave të ADN-së. Gjatë hetimeve, ai deklaroi se në momentin e vjedhjes kishte qenë nën ndikimin e alkoolit dhe drogës.

Në seancën e zhvilluar të martën, avokatja e tij, Pauline Collin, theksoi se klienti nuk i kundërshton faktet, duke kërkuar që gjykata të marrë parasysh rrethanat personale të tij.

Sipas mbrojtjes, 24-vjeçari kishte ardhur në Belgjikë për të punuar dhe kishte qenë i punësuar në një kafene dhe në sektorin e ndërtimit. Avokatja argumentoi se përdorimi i drogës dhe alkoolit, si dhe shoqëria e keqe, kishin ndikuar në sjelljen e tij. Megjithatë, shqiptari rezulton të jetë dënuar edhe më parë disa herë për vjedhje me thyerje.

Para gjykatës, 24-vjeçari shprehu pendesë për veprimet e tij.

“Më vjen jashtëzakonisht keq. Kam bërë gabime të rënda. Nuk isha vetvetja”, deklaroi ai, duke shtuar se pas lirimit nga burgu dëshiron të kthehet në Shqipëri.

Ndërkohë, Gjykata e Apelit në Gent pritet të shpallë vendimin më 24 nëntor.