SHBA miraton shitjen e raketave Patriot për Ukrainën, marrëveshja kap vlerën e 2.1 miliardë dollarëve

Departamenti Amerikan i Shtetit ka miratuar shitjen e mundshme të raketave të avancuara për sistemin e mbrojtjes ajrore Patriot në Ukrainë, me një vlerë totale të vlerësuar prej 2.1 miliardë dollarësh.

Sipas një njoftimi të Departamentit Amerikan të Shtetit, marrëveshja e mundshme përfshin raketa të tipit Patriot Advanced Capability-3 Missile Segment Enhancement (PAC-3 MSE), të cilat përfaqësojnë një version të avancuar të raketave interceptuese të sistemit Patriot.

Në njoftim bëhet e ditur se kontraktori kryesor i mundshëm për këtë marrëveshje do të jetë kompania amerikane e industrisë së mbrojtjes, Lockheed Martin.

Ky zhvillim vjen në kuadër të mbështetjes ushtarake amerikane për Ukrainën, ku sistemet Patriot përbëjnë një nga mjetet e rëndësishme për forcimin e mbrojtjes kundërajrore dhe antiraketore të vendit.