Robert Duka mohon akuzat për grabitjen e Raiffeisen Bank: Nuk kam lidhje me ngjarjen, nuk jam dënuar kurrë

Robert Duka, 50-vjeçari i arrestuar si i dyshuar për grabitjen e një filiali bankar në zonën e Komunës së Parisit në Tiranë, ka mohuar çdo përfshirje në ngjarje gjatë seancës për caktimin e masës së sigurisë.

Sipas gazetares, Anila Hoxha, Duka ka deklaruar para gjykatës se nuk ka qenë asnjëherë i dënuar më parë dhe se nuk ka lidhje me grabitjen. Ai ka kundërshtuar edhe provat e paraqitura nga Prokuroria, duke pretenduar se automjeti që shfaqet në pamjet e kamerave të sigurisë nuk e implikon në ngjarje.

Ndërkohë, organi i akuzës ka kërkuar masën “arrest me burg”, duke argumentuar se ndaj 50-vjeçarit ekzistojnë prova të mjaftueshme që e lidhin me grabitjen e ndodhur më 2 nëntor në një bankë të nivelit të dytë në zonën e Komunës së Parisit. Sipas hetimeve, autori dyshohet se hyri i maskuar në bankë, kërcënoi punonjësit me një send që ngjante me armë zjarri dhe u largua me një monopatinë elektrike, pasi mori një shumë parash.

Policia e Tiranës e arrestoi Dukën pas operacionit të koduar “Gjuetari i Bankave”, ndërsa gjatë kontrolleve i janë sekuestruar 8 200 euro, veshje që dyshohet se janë përdorur gjatë grabitjeve, si dhe dy telefona celularë. Hetuesit dyshojnë se ai është autor edhe i një tjetër grabitjeje bankare të ndodhur në qershor të këtij viti, po në zonën e Komunës së Parisit. 

Sipas dosjes hetimore, identifikimi i të dyshuarit është bërë përmes metodave speciale të hetimit, analizimit të pamjeve filmike dhe sistemeve teknologjike që kanë mundësuar identifikimin e tij pavarësisht maskimit. Gjykata pritet të vendosë mbi kërkesën e Prokurorisë për masën e sigurisë, ndërsa hetimet vijojnë.