Publikohen emrat, kush janë avokatët që rrezikojnë të humbasin licencën pasi thyen bojkotin

Dy avokatë të Dhomës Kombëtare të Avokatisë rrezikojnë humbjen e licencës pasi thyen bojkotin. 

Mësohet se Lefter Xhengo, avokati kryesisht i Leli Kajës, dhe Jurgen Gjoci, avokati i Greta Gjocit janë thirrur në orën 12:00 në një mbledhje urgjente të Komitetit Disiplinor. 

Lefter Xhengo theu sot bojkotin, duke marrë pjesë në seancën për masën e sigurisë ndaj administratorit të Inceneratorit të Elbasanit, Leli Kajës. Në rast se seanca e sotme nuk do të zhvillohej, Leli Kaja do lirohej pasi do të përfundonte afati i hetimit. 

Nga ana tjetër, Jurgen Gjoci mori pjesë në seancën e 8 tetorit, për Greta Gjocin, gruaja që u dërgua bashkë me foshnjën në burgun e Pojskës. Avokati mori pjesë në seancë në mënyrë që gruaja të lirohej dhe të mos shkonte në burg me fëmijën e mitur. Ai e argumentoi thyerjen e bojkotit për arsye humane.  

Dhoma Kombëtare e Avokatëve njoftoi bojkotin e të gjitha seancave të Gjykatës së Posaçme kundër Korrupsionit dhe Krimit të Organizuar, në shenjë proteste ndaj rregullores së GJKKO-së, për të cilën avokatët pretendojnë se cenon ushtrimin e profesionit të tyre. 

Ndërkohë, më 8 shtator, kreu i Dhomës së Avokatisë, Maks Haxhia deklaroi se të gjithë avokatët që do dalin kundër bojkotit, do të procedohen nga Komiteti i Disiplinës, duke rrezikuar edhe heqjen e licencës.  

Deri më tani, GJKKO ka vendosur gjoba me vlerë 50 dhe 60 mijë lekë, ndaj avokatëve të cilët nuk paraqiteshin në seanca./ Shekulli