Përsëritet njoftimi për pensionistët: Nga 1 janari dyfishohet bonusi mujor, rritet në prill

Ministri i Financave, Petrit Malaj, bëri sot të ditur se me buxhetin e vitit 2027 parashikohet rritja e mbështetjes financiare për pensionistët, përmes dy masave që synojnë përmirësimin e të ardhurave dhe lehtësimin e përballimit të shpenzimeve të përditshme.

Sipas Malajt, për zbatimin e këtyre masave parashikohen rreth 24 miliardë lekë shtesë.

“Me Buxhetin 2027, rrisim mbështetjen për pensionistët, që të përballojnë më lehtë nevojat e përditshme dhe të kenë më shumë siguri ekonomike. Parashikojmë rreth 24 miliardë lekë shtesë për dy masa që rrisin të ardhurat e tyre”, shkruan ai.

Masat e parashikuara përfshijnë dyfishimin e bonusit mujor për pensionistët, sipas kategorive, duke nisur nga 1 janari 2027, si dhe indeksimin e pensioneve në muajin prill, tre muaj më herët se zakonisht.

“Dyfishimin e bonusit mujor sipas kategorive, nga 1 janari 2027; Indeksimin e pensioneve në prill, tre muaj më herët”, theksoi ai.