Pas skandalit me 102 kontejnerët, KURUM-it i hiqet leja mjedisore, çfarë do të ndodhë me aktivitetin në Elbasan?

Ministria e Mjedisit shfuqizon lejen e KURUM në Elbasan, kompania nën hetim edhe për 102 kontejnerët me mbetje të rrezikshme
Ministria e Mjedisit ka shfuqizuar lejen mjedisore të kompanisë KURUM International për ushtrimin e aktivitetit metalurgjik në Bradashesh të Elbasanit.

Vendimi është marrë nga ministri i Mjedisit, Sofjan Jaupaj, i cili më 3 nëntor 2026 ka firmosur urdhrin nr. 540, përmes të cilit shfuqizohet leja mjedisore e tipit A, me numër PN-3843-09-2016, e shoqërisë KURUM International.

Leja në fjalë i mundësonte kompanisë ushtrimin e aktivitetit në Kombinatin Metalurgjik në Bradashesh, ndërsa me këtë vendim ministria i ka hequr kompanisë autorizimin mjedisor për këtë veprimtari.

Shfuqizimi i lejes vjen në një periudhë kur emri i kompanisë KURUM është përfshirë edhe në një prej çështjeve më të diskutuara që lidhen me menaxhimin dhe transportin e mbetjeve të rrezikshme në Shqipëri.

Bëhet fjalë për dosjen e 102 kontejnerëve me mbetje të rrezikshme, të cilët u nisën drejt Tajlandës dhe u kthyen në Shqipëri në tetor të vitit 2024, pasi u ngritën dyshime mbi përmbajtjen e ngarkesës.

Çështja u vu nën hetim nga Prokuroria e Durrësit, ndërsa KURUM International u përfshi në hetimet që lidhen me këtë transport të mbetjeve.

Vendimi i Ministrisë së Mjedisit për shfuqizimin e lejes mjedisore për aktivitetin metalurgjik në Bradashesh përbën një zhvillim të rëndësishëm për kompaninë, e cila prej vitesh ushtron aktivitet në sektorin e industrisë metalurgjike në Elbasan.

Megjithatë, në urdhrin e bërë publik në informacionin paraprak nuk janë dhënë detaje të plota mbi arsyet konkrete ligjore dhe teknike që kanë çuar në shfuqizimin e lejes, ndërsa mbetet për t'u parë se çfarë ndikimi do të ketë vendimi në vijimësinë e aktivitetit të kompanisë.

Ndërkohë, hetimet për dosjen e 102 kontejnerëve me mbetje të rrezikshme mbeten një tjetër çështje e rëndësishme që lidhet me emrin e kompanisë.