Miliona njerëz pa akses në email, probleme me Outlook në të gjithë botën! Preken edhe shërbime të tjera të Microsoft

Një nga shërbimet më të përdorura të postës elektronike në botë, veçanërisht për punë, ka dalë jashtë funksionit. Përdoruesit jo vetëm që nuk mund të dërgojnë apo të marrin email, por Microsoft Outlook nuk hapet fare.

Kur përpiqen të hyjnë në Outlook përmes shfletuesit të internetit, përdoruesve u shfaqet mesazhi “Something went wrong” (Diçka shkoi keq).

Mijëra përdorues nga e gjithë bota kanë raportuar probleme me Outlook, të cilat kanë nisur rreth orës 18:30. Dyshohet se shkaku mund të jetë një defekt në serverët e Microsoft. Edhe faqja që tregon nëse shërbimet e kompanisë po funksionojnë shfaq mesazhin e gabimit “502, Bad Gateway”, që tregon se shërbimi nuk po i përgjigjet sistemit Azure Front Door.

Ndërkohë, shumë përdorues po kërkojnë të mësojnë nëse Outlook ka rënë për të gjithë, ndërsa të tjerë po e presin situatën me humor, duke shpërndarë meme dhe imazhe të animuara në rrjetet sociale. Në fund të fundit, pa email është mjaft e vështirë të punohet në ditët e sotme.

Por problemet nuk janë kufizuar vetëm te Outlook. Edhe programet e tjera të Microsoft 365 kanë shfaqur probleme. Teams dhe Copilot, dy mjete që përdoren gjerësisht në punë, nuk janë më të disponueshme në kompjuterët e mijëra punonjësve.

Ndërkohë, Microsoft ka konfirmuar problemin.

“Ndërsa po punojmë për të zbutur ndikimin, kemi verifikuar se problemi mund të ndikojë në lidhjen me shërbimin Microsoft 365 për përdoruesit në çdo rajon të botës. Informacione të mëtejshme do të jenë të disponueshme në Qendrën e Administrimit të Microsoft 365, me referencën EX1550543”, njoftoi kompania.

Por disa përdorues kanë komentuar me ironi se do të ishte mirë të merrnin informacione nga kjo qendër, nëse edhe ajo vetë nuk do të ishte jashtë funksionit.