Kosovë/ Nesër mbahet seanca e jashtëzakonshme për formimin e Qeverisë

Kuvendi i Kosovës ka njoftuar se të mërkurën në orën 14:00 do të mbahet seanca e jashtëzakonshme për zgjedhjen e Qeverisë së Republikës së Kosovës.

Ndërkohë, nga ora 11:00 do të zhvillohet një tjetër seancë për formimin e komisioneve parlamentare, ku do të diskutohet për buxhetin, marrëveshjet ndërkombëtare dhe financimin e RTK-së.

I mandatuari për formimin e qeverisë është Glauk Konjufca nga Lëvizja Vetëvendosje, i cili u mandatua nga presidentja Vjosa Osmani më 4 nëntor. Konjufca ka kërkuar mbështetjen e deputetëve për qeverinë e tij, për të shmangur zgjedhjet e parakohshme dhe për të siguruar një ekzekutiv “së paku” deri në prill, kur pritet të zgjidhet presidenti i ri i vendit.

Megjithatë, ish-opozita e bashkuar mbetet pro idesë për zgjedhje të reja, duke e bërë të vështirë krijimin e qeverisë nga LVV-ja në këtë përpjekje të dytë. Më 26 tetor, Albin Kurti dështoi të siguronte votat e nevojshme për formimin e ekzekutivit.

LVV-ja fitoi zgjedhjet e 9 shkurtit, por nuk ka numrin e mjaftueshëm të ulëseve në Kuvend për të formuar qeverinë pa mbështetje nga partitë e tjera. Nëse nesër nuk arrihet shumica për formimin e qeverisë, procesi do të çojë automatikisht në zgjedhje të jashtëzakonshme