Korçë, humb jetën 60-vjeçari dhe plag'oset polici në aksidentin e rëndë

Një aksident i rëndë ka ndodhur pak më parë në hyrje të Korçës, në afërsi të fshatit Çiflig, ku një punonjës policie i qarkullimit, pas lënies së shërbimit, ka goditur me mjetin e tij një motomjet, ku për pasojë mësohet se ka ndërruar jetë një shtetas.
 
Viktima, drejtuesi i motorit mësohet të jetë rreth 60 vjeç. Ndërsa, punonjësi i policisë ka mbetur i lënduar dhe është dërguar në spitalin e Korçës për ndihmë mjekësore, ku ndodhet në reanimacion.

Nga ana e Policisë dhe grupit hetimor po kryhen veprimet përkatëse për zbardhjen e plotë të rrethanave të ngjarjes.

Njoftimi:

Korçë/Informacion paraprak

Rreth orës 07:10, në aksin rrugor “Korçë-Pogradec”, në afërsi të fshatit Bulgarec, automjeti me drejtues shtetasin D. M., rreth 30 vjeç, punonjës policie jashtë shërbimit, është përplasur me një biçikletë që drejtohej nga shtetasi R. A., rreth 60 vjeç.

Si pasojë e përplasjes, shtetasi R. A. ka humbur jetën në vendngjarje.

Drejtuesi i automjetit, shtetasi D. M., po merr mjekim në spital, në gjendje të rëndë shëndetësore.

Grupi hetimor dhe Agjencia e Mbikëqyrjes Policore (AMP), nën drejtimin e Prokurorisë, ndodhen në vendngjarje dhe po punojnë për sqarimin e rrethanave dhe shkaqeve të aksidentit.