GJKKO lë në fuqi gjobat ndaj Plarent Ndrecës, avokati i Veliajt duhet të paguajë 150 mijë lekë

Gjykata e Posaçme kundër Korrupsionit dhe Krimit të Organizuar ka lënë në fuqi dy gjobat e vendosura ndaj Plarent Ndrecës, avokatit të kryebashkiakut të Tiranës, Erion Veliaj. Bëhet fjalë për dy masa administrative në vlerat 50 mijë dhe 100 mijë lekë, të cilat ishin vendosur për shkak të mungesave të tij në seancat gjyqësore të procesit ndaj Veliajt.
Plarent Ndreca kishte kundërshtuar vendimin e gjykatës, duke kërkuar shfuqizimin e të dyja gjobave. Masat ishin marrë në periudhën kur avokatët kishin bojkotuar seancat gjyqësore, në kuadër të protestës së tyre kundër zhvillimeve që lidhen me sistemin e drejtësisë.
Pas shqyrtimit të kërkesës së paraqitur nga avokati, GJKKO ka vendosur mospranimin e saj. Në këtë mënyrë, gjykata ka konfirmuar masat administrative të vendosura më herët, duke lënë në fuqi detyrimin për pagesën e dy gjobave, të cilat në total arrijnë në 150 mijë lekë.
Vendimi i fundit vjen në kuadër të procesit gjyqësor ndaj kryebashkiakut të Tiranës, Erion Veliaj, ku Plarent Ndreca është pjesë e ekipit mbrojtës. Kundërshtimi i gjobave lidhej pikërisht me mungesat në seancat e zhvilluara gjatë bojkotit të avokatëve.
Me këtë vendim, kërkesa e Ndrecës për shfuqizimin e masave administrative nuk është pranuar dhe të dyja gjobat mbeten në fuqi.


