Goditet rrjeti shqiptar në Belgjikë, 2 mijë bimë kana'bisi dhe 55 kg dro'gë të sekuestruara

Gjashtë shtetas shqiptarë kanë përfunduar në burg në Belgjikë, pasi policia zbuloi një rrjet të dyshuar të organizuar për kultivimin e paligjshëm të kanabisit, i cili vepronte në disa zona të vendit. Operacioni u zhvillua më 9 nëntor, pas një hetimi të nisur gjatë vitit 2026 nga policia lokale e Leuvenit.
Sipas mediave belge, kontrollet u ushtruan njëkohësisht në pesë banesa në Etterbeek, Evere, Leuven, Overijse dhe Tervuren, në kuadër të një hetimi për një organizatë kriminale të dyshuar për prodhimin e kanabisit. Aksioni u shtri në tre rajone policore, Leuven, Halle-Vilvoorde dhe Bruksel.
Gjatë kontrolleve, autoritetet zbuluan tri plantacione profesionale të kanabisit, dy prej të cilave ishin në funksion të plotë. Në total u gjetën më shumë se 2 mijë bimë kanabisi, ndërsa në ambientet e kontrolluara u sekuestruan edhe rreth 55 kilogramë kanabis i korrur.
Përveç lëndës narkotike, policia gjeti dhe sekuestroi mbi 17 mijë euro para në dorë. Të gjitha plantacionet u çmontuan, ndërsa kanabisi i sekuestruar do të shkatërrohet.
Në pranga përfunduan gjashtë burra me shtetësi shqiptare, të moshave 29 deri në 57 vjeç. Ata u paraqitën më 10 nëntor para gjyqtarit hetues, i cili vendosi arrestimin e tyre. Të dyshuarit akuzohen për shkelje të legjislacionit për narkotikët, konkretisht kultivim të kanabisit dhe pjesëmarrje në një organizatë kriminale.
Sipas televizionit publik belg VRT dhe mediave të tjera lokale, hetimi u mbështet edhe nga struktura të tjera policore, përfshirë Policinë e Aviacionit në Charleroi, e cila kishte ndihmuar për disa muaj në këtë çështje. Autoritetet nuk kanë bërë të ditur ende se çfarë roli ka pasur secili prej gjashtë të arrestuarve në aktivitetin e dyshuar kriminal.
Ky nuk është rasti i parë ku shtetas shqiptarë dyshohen për përfshirje në kultivimin e paligjshëm të kanabisit në Belgjikë. Në dhjetor të vitit 2025, një gjykatë në Bruksel dënoi me burgim 10 shtetas shqiptarë për kultivim ilegal të kanabisit.
Ndërkohë, një hetim i përbashkët i mediave Knack, Le Soir dhe RTBF, i publikuar në qershor 2026, ngriti shqetësimin për zgjerimin e rrjeteve kriminale shqiptare në Belgjikë dhe përfshirjen e tyre në aktivitetet e paligjshme të drogës.
Edhe rasti i fundit ka rikthyer vëmendjen te aktiviteti i dyshuar i këtyre organizatave në vend, ndërsa hetimet vijojnë për të zbardhur plotësisht mënyrën e funksionimit të rrjetit, personat e tjerë që mund të jenë të përfshirë dhe përmasat e aktivitetit kriminal.


