Fituesi i Çmimit Nobel, në ekonomi: Evropa duhet të përqafojë 'shkatërrimin krijues' të Inteligjencës Artificiale

Bota

Fituesi i Çmimit Nobel, në ekonomi: Evropa duhet të

Fituesi i Çmimit Nobel, Philippe Aghion, i kërkoi BE-së të inkurajojë lojtarët e rinj në tregun e inteligjencës artificiale, të zbusë kufizimet përmes ndihmës shtetërore dhe të forcojë mbrojtjen për punonjësit që humbin vendin e punës apo përballen me ndërprerje teknologjike

Inteligjenca artificiale (IA) mund të nxisë rritjen ekonomike në Evropë, me kusht që rregullat e konkurrencës së BE-së të lejojnë kompanitë e reja të hyjnë në treg, thekson ekonomisti fitues i Çmimit Nobel, Philippe Aghion.

Ai i bëri këto komente, mes shqetësimeve në rritje mbi dominimin e një numri të vogël kompanish amerikane në tregun e inteligjencës artificiale dhe ndikimin e teknologjisë në punësim, nisur nga frika e humbjeve së vendeve të punës gjatë viteve të ardhshme.

“Me anë të inteligjencës artificiale, më shumë se kurrë, ndodh shkatërrimi krijues, sepse nëse shikoni shkallën e shkatërrimit dhe krijimit të vendeve të punës, një fenomen i tillë po përshpejtohet nga revolucioni i inteligjencës artificiale - dhe prandaj është shumë e rëndësishme që të lejohet hyrja e  firmave të reja”, tha Aghion gjatë një eventi në Bruksel.

“Në të njëjtën kohë”, shtoi ai, “është e rëndësishme të kemi institucione si sistemi i fleksigurisë që lehtëson kalimin nga vendet e vjetra të punës në vendet e reja të punës, sepse ndihmon në menaxhimin e ‘përçarjes’ kritike.”

Aghion vuri në dukje modelin e tregut të punës në Danimarkë, i cili kombinon fleksibilitetin në punësim dhe shkarkim me një rrjet sigurie bujar për punëtorët e papunë.

Një raport i kohëve të fundit i Komisionit Evropian zbulon se punësimi në mesin e punëtorëve me kualifikime të larta mund të rritet me 20% deri në vitin 2040 falë inteligjencës artificiale, ndërsa humbjet e vendeve të punës në mesin e punëtorëve me kualifikime të ulëta mund të variojnë nga 20% në 60% në të gjithë Evropën.

Aghion ndau Çmimin Nobel të Shkencave Ekonomike për vitin 2025 për punimin e tij shkencor mbi “shkatërrimin krijues”, proces i cili shpjegon sesi inovacionet e fundit vazhdimisht zëvendësojnë teknologjitë, bizneset dhe vendet e vjetra të punës.

Aghion u shpreh se sistemet e mirëqenies sociale të BE-së janë më mirë të pajisura se sistemi amerikan për të menaxhuar ndryshimet në punësim të lidhura me inteligjencën artificiale: “Ne jemi përpara SHBA-së kur bëhet fjalë për tregun e punës që duhet të akomodojë revolucionin e inteligjencës artificiale.”

Megjithatë, nobelisti shprehet se BE-ja duhet të frymëzohet nga SHBA-ja në aspektin e politikës industriale për të siguruar që inteligjenca artificiale të shoqërohet me rritje dhe vende pune.

“Në SHBA, ata kanë si politikë konkurrence ashtu edhe politikë industriale. Kanë DARPA-n - Agjencinë e Projekteve të Kërkimit të Avancuar të Mbrojtjes - e cila është një mënyrë miqësore ndaj konkurrencës për të hartuar politika industriale.”

DARPA është një agjenci amerikane përgjegjëse për zhvillimin e teknologjive të reja të mbrojtjes. “Në Evropë deri më tani nuk kemi ekuivalentin e DARPA-s dhe do të imagjinoja shumë mirë që një e tillë të zhvillonte fuqinë kompjuterike të inteligjencës artificiale dhe po ashtu kjo do të inkurajonte firmat e reja të hynin [në treg].”

Ai shtoi se qasja e BE-së ndaj politikës së konkurrencës po e “pengon” sektorin nga marrja e ndihmës shtetërore, “gjë që ishte një politikë shumë anti-industriale”.

Aghion argumentoi se rregullat e konkurrencës së BE-së duhet të inkurajojnë hyrësit e rinj dhe të promovojnë ndarjen e të dhënave në të gjithë zinxhirin e vlerave të IA-së, përfshirë edhe ‘cloud computing’.

Dominimi i gjigantëve të teknologjisë amerikane në sektorin e inteligjencës artificiale ka nisur të shqyrtohet me kujdes nga rregullatorët e BE-së. 

ME TE LEXUARAT

NA SHKRUAJ

Portali Lajmifundit sjell Lajme nga Shqipëria, rajoni dhe bota në kohë rekord. Ju lutemi na kontaktoni nëse doni të kontribuoni me informacione të vlefshme për publikim në portalin tonë.

Kliko për më shumë informacion