Presidenti Biden bisedon me Erdoganin përpara vendimit për Armeninë

Presidenti amerikan Joe Biden ka biseduar me Presidentin e Turqisë Rexhep Tajip Erdogan të premten, ndërsa përgatitet për të njohur zyrtarisht se mizoritë e kryera kundër popullit armen nga Perandoria Osmane më shumë se një shekull më parë ishin gjenocid.

Biden u zotua si një kandidat për të njohur vrasjet e epokës së Luftës së Parë Botërore dhe dëbimet e qindra mijëra armenëve në Turqinë e sotme.

Sot në Ditën Përkujtimore të masakrës ndaj armenëve, Biden pritet të deklarojë se vrasja dhe dëbimi i armenëve në Perandorinë Osmane më 1915 përbëjnë gjenocid.

Qeveritë e SHBA dhe Turqisë, në deklarata të veçanta mbi thirrjen, nuk përmendën vendimin e afërt për njohjen e gjenocidit Armen. Por Shtëpia e Bardhë tha se Biden i tha Erdoganit se ai dëshiron të përmirësojë marrëdhëniet midis dy vendeve dhe të gjejë “menaxhim efektiv të mosmarrëveshjeve”. Të dy ranë dakord gjithashtu të zhvillojnë një takim dypalësh në samitin e NATO-s në Bruksel në qershor.

“Presidenti Biden bisedoi me presidentin turk, Recep Tayyip Erdogan, dhe tregoi interesin e tij për raporte konstruktive bashkëpunimi dhe menaxhim efektiv të mosmarrëveshjeve”, tha Shtëpia e Bardhë në një deklaratë.

Zyrtarët thanë se Biden donte të fliste me Erdogan para se të njihte zyrtarisht ngjarjet nga 1915 deri në 1923 si gjenocid – diçka që presidentët e kaluar të SHBA kishin shmangur nga shqetësimi për dëmtimin e marrëdhënieve me Turqinë.

Telefonata e së premtes midis dy udhëheqësve ishte e para që kur Biden mori detyrën më shumë se tre muaj më parë. Vonesa ishte bërë një shenjë shqetësuese në Ankara; Erdogan kishte një raport të mirë me ish-Presidentin Donald Trump dhe kishte shpresuar për një rivendosje pavarësisht fërkimeve të së kaluarës me Biden.