NASA jep lajmin, Ingenuity fluturon për herë të tretë në Mars

Fluturon për herë të tretë në Mars, helikopteri i NASA-s, Ingenuity. Sipas Agjencisë amerikane të Hapësirë, Ingenuity është ngjitur në pesë metra lartësi, dhe më pas ka kryer 50 metra fluturim, duke lëvizur anash.

Ndërkohë që u janë dërguar foto ekipeve të NASA-s në Tokë. Fotot mbi sipërfaqen e Marsit, janë bardhë e zi. NASA bën me dije se Ingenuity më pas është kthyer në vendin ku është nisur, pas 80 sekondash të fluturimit.

NASA ka thënë se materiali i incizuar gjatë fluturimit do të dërgohet në Tokë në ditët në vijim. Kjo agjenci është duke planifikuar edhe fluturime tjera me këtë helikopter në të ardhmen, për të parë terrenin e planetit si dhe për të dhënë udhëzime për anije kozmike apo astronautët.

Ky helikopter ka arritur në Mars në mesin e muajit shkurt me një anije kozmike të quajtur Perseverance. Më 19 prill, ky helikopter ka kryer fluturimin e parë të kontrolluar nga një planet tjetër.