Bombë lokalit të shqiptarit në Athinë, dyshimet e policisë

Një tjetër incident me eksploziv ka tronditur zonën Agios Panteleimonas në Athinë, ku një biznes në pronësi të një shqiptari është vënë sërish në shënjestër.

Ngjarja ka ndodhur në orët e para të mëngjesit, në rrugën “Acharnon”. Dy persona që udhëtonin me një motor janë afruar pranë lokalit dhe kanë hedhur një granatë. Pajisja nuk ka shpërthyer, duke shmangur një pasojë potencialisht më të rëndë.

Pas largimit të autorëve, vendi është rrethuar nga policia dhe ka qëndruar i bllokuar për disa orë. Njësitë e specializuara të ushtrisë greke kanë mbërritur në terren dhe kanë bërë të mundur heqjen e granatës pa rrezikuar banorët dhe kalimtarët.

Autoritetet greke e konsiderojnë incidentin pjesë të një situate më të gjerë, pasi i njëjti lokal ishte sulmuar edhe më herët. Më 8 shtator, një person kishte dëmtuar xhamin e biznesit dhe kishte hedhur një granatë brenda tij. Në atë periudhë ishte sulmuar gjithashtu një biznes në pronësi të një shtetasi sirian.

Rasti po hetohet nga departamenti i Policisë greke që merret me zhvatjet. Një nga pistat kryesore lidhet me aktivitetin e grupeve që kërkojnë pagesa nga pronarët e bizneseve, duke u ofruar në këmbim mbrojtje.

Hetuesit po shqyrtojnë edhe mundësinë e përfshirjes së një shtetasi shqiptar që aktualisht ndodhet në burg dhe që dyshohet se mund të drejtojë veprimtari kriminale përmes personave të tjerë. Megjithatë, lidhja e tij me sulmin nuk është provuar.

Një detaj tjetër që po verifikohet është fakti se policia kishte kontrolluar lokalin vetëm dy orë para sulmit, por pa gjetur personat që kërkonte.