Ushtronte aktivitetin e paligjshëm të lojrave të fatit, pranga 26-vjeçarit në Kuçovë

Policia e Kuçovës ka arrestuar një 26-vjeçar, pasi u konstatua se po ushtronte aktivitetin e lojrave të fatit online. Sipas policisë, shtetasi Xh. H ka qenë edhe një herë i dënuar për këtë vepër penale. Ndërkohë policia ka proceduar penalisht një 29-vjeçar, për veprën penale "Organizimi i lotarive të palejuara".

“Kuçovë/ Vijojnë kontrollet për parandalimin, evidentimin dhe goditjen e paligjshmërisë. Si rezultat i kontrolleve janë goditur dy raste të aktivitetit të kundërligjshëm në fushën e lojërave të fatit.   Arrestohet 1 shtetas dhe procedohet penalisht 1 shtetas tjetër që ushtronin këtë veprimtari. 

Në vijim të punës për evidentimin dhe ndëshkimin e paligjshmërisë, shërbimet e Komisariatit të Policisë Kuçovë në bashkëpunim me AMLF, kanë konstatuar në lagjen "Tafil Skëndo", Kuçovë dy raste të ushtrimit të aktivitetit të paligjshëm të lojërave të fatit online.

Në përfundim të veprimeve hetimore, specialistët për Hetimin e Krimeve në Komisariatin e Policisë Kuçovë arrestuan shtetasin Xh.H., 26 vjeç (i dënuar më parë për këtë vepër penale) dhe proceduan penalisht shtetasin E.H., 29 vjeç, të dy banues në Kuçovë, për veprën penale "Organizimi i lotarive të palejuara". Në cilësinë e provës materiale janë sekuestruar 11 tableta, të cilat dyshohet se shërbenin për vendosjen e llotove të sportit.

Materialet procedurale i kaluan Prokurorisë pranë Gjykatës së Shkallës së Parë Berat, për veprime të mëtejshme”, njofton policia.